Döyüş növləri

Döyüş növləri

Xaqani Məmmədov Azərbaycan çempionatının tarixinə düşüb

13 avqust 2007 09:41 (UTC +04:00)

“İnter” klubunun hücumçusu Xaqani Məmmədov Azərbaycan çempionatının tarixinə düşüb. “APA-Sport” agentliyinin məlumatına görə, 31 yaşlı futbolçu “Masalı” ilə görüşün 36-cı dəqiqəsində hesabı açmaqla, XVI milli çempionatının ilk qolunun müəllifi olub. Avqustun 11-də keçirilən oyunlarda “Neftçi” klubunun serbiyalı hücumçusu Branimir Subaşiç daha tez (14-cü dəqiqə) fərqlənib. Ancaq “Neftçi” “Turan” oyunu “İnter” “Masallı” matçı başa çatdıqdan sonra başlandığı üçün X.Məmmədov serbiyalı futbolçunu qabaqlayıb. X.Məmmədov, həm də “İnter” klubunda debütünü qolla qeyd edib. Onunla birgə mövsümlərarası fasilədə “Olimpik”dən “İnter”ə keçən Nizami Hacıyev də yeni klubunda ilk oyunda qol vurub. “Qəbələ” klubunun heyətində ilk matçında fərqlənən gürcüstanlı legioner Tornike Aptsiuari Azərbaycan çempionatında debütünü qolla qeyd edib.
X.Məmmədov XVI milli çempionatında ilk sarı vərəqənin müəllifi kimi də tarixə düşə bilərdi. Ancaq “Qəbələ”nin oyunçusu Asif Məmmədov X.Məmmədovun 14-cü dəqiqədə aldığı sarı vərəqədən üç dəqiqə tez sarı vərəqə almaqla, yeni mövsümün ilk cəzalanan futbolçusu olub. A.Məmmədov “Standard-Bakı” ilə oyunda 66-cı dəqiqədə baş hakim Babək Quliyev tərəfindən ikinci sarı vərəqəni almaqla, XVI milli çempionatın ilk qırmızı vərəqə alan futbolçusu kimi də tarixə düşüb. İlk turda daha bir qırmızı vərəqə alan “Bakı”nın oyunçusu Romal Hüseynov olub. O, “Gənclərbirliyi” ilə matçda bir dəqiqəyə iki sarı vərəqə alıb. Matçın baş hakimi Eldar Nağıbəyov kobud oyuna görə 85-ci dəqiqədə sarı vərəqə ilə cəzalandırdığı R.Hüseynovu qərarından narazılığa görə, meydandan qovub. Qeyd edək ki, ilk turun iştirakçıları arasında “Neftçi” və “Qarabağ” istisna olmaqla, qalan komandalar hakimlər tərəfindən vərəqə ilə cəzalandırılıb. /APA-Sport/