Döyüş növləri

Döyüş növləri

AFFA “Neftçi” klubuna xəbərdarlıq məktubu göndərəcək

13 avqust 2007 13:45 (UTC +04:00)

AFFA “Neftçi” klubuna xəbərdarlıq məktubu göndərəcək. Bu barədə “APA-Sport” agentliyinə AFFA-nın Nizam-İntizam Komitəsinin sədri Tofiq Fətullayev məlumat verib. XVI Azərbaycan çempionatının ilk turunda “Neftçi” “Turan” oyununa AFFA nümayəndəsi təyin edilən T.Fətullayev stadionda istefa şüarlarının səslənməsinin xoşagəlməz hal olduğunu bildirib: “Baş məşqçi Qurban Qurbanovla bağlı istefa şüarlarını eşitdim. Bununla bağlı, “Neftçi”nin fan-klubuna məktub göndərərək, onları xəbərdarlıq edəcəyik. Bu, bir daha təkrarlanarsa, “Neftçi” klubunu Nizam-İntizam Məcəlləsinin müvafiq maddəsinə uyğun cəzalandıracağıq”. T.Fətullayevin sözlərinə görə, milli çempionat yenicə start götürdüyündən “Neftçi” klubuna güzəşt ediləcək: “Çempionatın ilk turunun olmasını nəzərə alıb, əvvəlcə xəbərdarlıq edəcəyik. Stadionlarda istefa tipli xoşagəlməz şüarlar bundan sonra da səslənərsə, güzəştə getməyib, komandalara cəza verəcəyik”. Məsələyə sabah baxılacağını deyən T.Fətullayevin sözlərinə görə, qərar çıxarıldıqdan sonra məktub “Neftçi” klubuna göndəriləcək. /APA-Sport/