Döyüş növləri

Ana səhifə

Döyüş növləri

Vladimir Afanasyev: “Banişevskini heç nəyə biganə qalmayan futbolçu, gözəl insan kimi xatırlayıram”

14 avqust 2007 09:39 (UTC +04:00)

Rusiyanın Nijeqorodsk vilayətinin Futbol Federasiyasının və “Privoljye” Regional Futbol İttifaqının prezidenti Vladimir Afanasyevin “APA-Sport” agentliyinə müsahibəsi
- Vladimir İvanoviç, Rusiyanın Nijni-Novqorod şəhərində Anatoli Banişevskinin xatirəsinə keçirilən turnir barədə nə deyə bilərsiniz?
- Nijeqorodsk vilayətindəki azərbaycanlıların Regional Milli Mədəni Muxtariyyəti tərəfindən Anatoli Banişevskinin xatirəsinə turnir keçirmək barədə müraciət aldıqda, biz bu təklifi məmnuniyyətlə qəbul etdik. Çünki dahi sovet futbolçusu, əsl sovet futbol məktəbini keçmiş Banişevski futbolun inkişafına böyük töhfə verib. Keçmiş SSRİ yığmasının heyətində Avropa və dünya çempionatlarında iştirak edib. Gənclərdən ibarət bütöv bir nəsil onun adı ilə böyüyüb. Eyni zamanda, “Neftçi” klubu sovet futbolunun inkişafında xüsusi izlər buraxıb. Ölkənin aparıcı komandalarından biri olub, həm Azərbaycanda, həm də keçmiş SSRİ-də xeyli tamaşaçı rəğbəti qazanıb. Bu turnirin böyük çəkiyə malik olmasının digər göstəricisi isə fikrimcə, yaşlı və orta nəslin insanları bu futbolçunu xatırlayır. Biz istərdik ki, Banişevskinin xatirəsinə keçirilən turnir barədə televiziya və ya qəzet vasitəsilə xəbər tutan çoxsaylı gənclər də futbolla məşğul olsun. Bəlkə onlardan da yaxşı futbolçular çıxacaq, ustalardan ibarət komandalarda və ya Rusiya yığmasında çıxış edəcəklər.
- Banişevski nə vaxtsa Nijni-Novqorodda olubmu?
- Xeyr, o, heç vaxt Nijni-Novqorodda olmayıb. Amma mən Banişevskini yaxşı xatırlayıram. Biz hətta tanış olmuşuq. O ,“Neftçi”də çıxış etdiyi vaxt mən Luqanskın “Zarya” komandasının heyətində çıxış edirdim. Biz həmin vaxt çempion olmuşduq. Yadımdadır, həmin dövrdə “Neftçi” ilə birgə təlim-məşq toplantısında olmuşduq. Banişevkini heç nəyə biganə qalmayan futbolçu, gözəl insan kimi xatırlayıram. Onu Bakıda da həm insan, həm də futbolçu kimi sevir və hörmət edirlər.
- Bu turnir ənənəvi ola bilərmi və bu baxımdan, siz hansı köməyi göstərə bilərsiniz?
- Bu, birinci turnirdir. İlk dəfə yarış təşkil etmək həmişə çətin olur. Çoxlu veteran komandanın bu turnirə qatılması çox sevindiricidir. Gələcəkdə istərdik ki, bizim hansısa veteranlardan ibarət komandamız da Bakıya səfər etsin və paytaxtınızda da belə yoldaşlıq, dostluq görüşləri keçirsin. Bu, ölkələrimiz arasında dostluq əlaqələrinin möhkəmlənməsinin xeyrinə olacaq. Ümumiyyətlə, veteranların ünsiyyətdə olması və Azərbaycan və Rusiya idmançılarının dostluq etməsi maraqlı olardı. Əvvəllər vahid ailə idik, sonradan bizi ayırdılar. Buna görə də indi xalqlarımızın dostluq əlaqələrinin möhkəmlənməsi istiqamətində çalışmalıyıq.
- Nijeqorodsk vilayətinin komandalarında çıxış edən azərbaycanlı futbolçu tanıyırsınız?
- Nijni-Novqorodun şəhər birinciliyində hamısı azərbaycanlılardan ibarət “Azəri” komandası çıxış edir. Yaxşı futbol oynayırlar. Fikrimcə, “Azəri”yə qarşı çıxış etmək yerli futbolçuların da xoşuna gəlir. Meydançada oyunçuların milli baxımdan heç bir problemi yoxdur.
- Vilayətiniz Rusiya çempionatında necə təmsil olunur?
- Bizim “Volqa” adlı komandamız var. Rusiya çempionatının ikinci liqasında “Ural-Povoljye” zonasında çıxış edir. Komandanın qarşısına birinci diviziona vəsiqə qazanmaq məqsədi qoyulub. Buna nail olsa, “Volqa”nın heyətini daha da gücləndirərək, premyer-liqada iştirakına nail olacağıq. Vaxtilə Nijni-Novqorod komandalarından “Volqa” SSRİ çempionatında, “Lokomotiv” isə Rusiya çempionatının yüksək liqasında uzun müddət çıxış edib. Şəhər, vilayət rəhbərliyinin komandaya göstərdiyi münasibətdən də çox şey asılıdır.
- Azərbaycanlı futbolçuların “Volqa”da çıxış etmə perspektivi varmı?
- Hələlik komandalarımızda çıxış edən azərbaycanlı futbolçuların sayı azdır. Amma fikrimcə, belə turnirlər yenə də keçirilərsə, burada yaşayan azərbaycanlı gənclər də komandalarımıza cəlb olunacaq. /APA-Sport/