Döyüş növləri

Ana səhifə

Döyüş növləri

İqor Ponomaryov: “Qurban Qurbanovun məşqçi kimi təcrübəsi yetərincə deyil”

14 avqust 2007 11:03 (UTC +04:00)

- Son vaxtlar “Neftçi” klubunun baş məşqçi postuna gətiriləcəyiniz haqda məlumatlar yayılıb. Mümkündürsə, bütün bunlara aydınlıq gətirərdiniz...
- Bu haqda eşitmişəm. Dost-tanışlar zəng edib, maraqlanırlar. Ancaq bu, həqiqətəuyğun deyil. Hazırda İsveçdəyəm və son vaxtlar Bakıya səfərim olmayıb.
- Ümumiyyətlə, “Neftçi” klubundan təklif almısınız?
- Xeyr.
- Təklif alsanız necə, qəbul edərsiniz?
- Təklif almadığımdan, söz-söhbət haqda danışmaq yersiz olardı. Mənim “Neftçi”nin hazırkı rəhbərliyi ilə tanışlığım yoxdur. Sadəcə, onu bilirəm ki, bu komandanın baş məşqçisi Qurban Qurbanovdur.
- Hər halda, “Neftçi” sizin üçün doğma klubdur. Futbolçu karyeranızı həsr etdiyiniz komandada baş məşqçi işləmək yəqin ki, ürəyinizdən keçir...
- Sözsüz. “Neftçi” mənə doğmadır və karyeram daha çox bu klubla bağlıdır. Mən futbolçu kimi bu klubda böyümüşəm. Futbolda ilk addımlarımı “Neftçi”də atmışam. 17 yaşımda məni bu klubun əvəzedici komandasına götürüblər. 29 yaşımadək “Neftçi”də çıxış etmişəm, futbolçu karyeramda ən yaddaqalan illəri bu klubla keçirmişəm. Amma “Neftçi”nin baş məşqçisi postunda işləmək planlarımda yoxdur.
- “Neftçi” kimi iddialı klubun son vaxtlar uğursuzluq zolağına düşməsi, bu söz-söhbətlərə əsas verir...
- “Neftçi”nin yeni çempionata məğlubiyyətlə başlamasından xəbərim var. İlk turda Bakıda “Turan”a 1:2 hesabı ilə uduzmasını internetdən oxudum. Fikrimcə, bir oyunla təşvişə düşmək lazım deyil. Çempionat yeni başlayıb, güclü klubların ilk turda məğlub olması müşahidə olunan hadisədir. Qurban Qurbanovu bir oyuna görə işindən kənarlaşdırmağı düzgün saymıram. Hələ qarşıda çoxlu görüşlər var. Qurbana şans vermək lazımdır. “Neftçi” bir məğlubiyyətlə Qurban Qurbanovu istefaya göndərməklə tələsik addım atmış olar.
- Bu il 70 illiyini qeyd edən “Neftçi” çempion olmadı, kuboku qazanmadı və UEFA kubokunda mübarizəni ilk mərhələ dayandırdı...
- “Neftçi” həmişə iddialı olduğunda, daha çox diqqət mərkəzində olub. Uğursuzluğa görə, ruhdan düşmək lazım deyil, gələcəyə nikbin baxmaq lazımdır.
- Qurban Qurbanovun bir məşqçi kimi uğur qazanacağına inanırsınızmı?
- Yaxşı futbolçu olub. Karyerası boyu həm millidə, həm də klublarda çoxlu oyun keçirib, çoxlu qol vurub. Ölkə kənarında, Rusiyada çıxış edib, böyük təcrübə qazanıb. Qurbanın məşqçi kimi işini görməmişəm. Bu səbəbdən fikir yürütmək, qiymət vermək çətindir. Ola bilsin ki, məşqçi kimi ilk addımlarını atdığından, Qurbanın təcrübəsi yetərincə deyil. Ona inanıb, etimad göstərməyi daha məqsədəuyğun sayıram.
- “Neftçi” UEFA kubokunda mübarizəni ilk mərhələdə dayandırması necə qəbul etdiniz?
- “Neftçi”nin UEFA kubokunda birinci təsnifat mərhələsində Avstriyanın “Rid” klubu ilə oyunlarını görməmişəm. Buna görə də fikir yürütməkdə çətinlik çəkirəm.
- Ümumiyyətlə, avrokuboklarda hansısa klubumuzun oyununu izləmisinizmi?
- Xeyr.
- Azərbaycan futbolunda son vaxtlar baş verən proseslər haqda məlumatınız varmı? “MKT-Araz”ın dağılmasından yəqin ki, xəbərdarsınız?
- Bəli. “MKT-Araz”ın dağılmasına çox təəssüfləndim, sarsıldım. Bu, Azərbaycan futbolu üçün üzücü olaydır. Cəmi üç illik tarixi olan komandanı itirmək pis haldır. “MKT-Araz”ın rəhbərliyi klub üçün nə qədər pul xərclədi, infrastruktur yaratdı, baza, stadion tikdi. Bütün bunlar ola-ola klubun dağılmasını mənə qaranlıq qaldı. Üstəlik, bu klub UEFA kubokunda çıxış edib, çempionatın başlanmasına çox az qalmış dağılmasını anlamadım.
- Artıq iki aydır işsizsiniz. Yəqin ki, bu müddətdə təklif almısınız.
- Təkliflər olub, konkret danışıqlar aparmışam. Hətta bunu üçün səfərə çıxmışam. Ancaq həmin klubların təkliflərini qəbul etməyi məqsədəuyğun saymamışam.
- Belə başa düşdüm ki, təkliflər İsveçdən kənardan da olduğundan, bu ölkəni tərk etmisiniz?
- Bəli. Aldığım təklifləri nəzərdən keçirmək üçün İsveçdən kənara çıxmışam.
- Konkret hansı ölkələrə? Bunlar arasında Azərbaycan olub?
- Konkret ad çəkmək nəyə lazımdır? Rusiyanın “Maşuk-KMV” klubundan getdikdən sonra Azərbaycandan təklif almamışam.
- Sizi nə vaxt yeni klubun sükanı arxasında görə bilərik?
- Hələlik İsveçdəyəm və bir müddət də istirahət edəcəyəm. Yəqin ki, ilin sonunadək bir şey reallaşar.
- Azərbaycana nə vaxt səfər etməyi planlaşdırırsınız?
- Payızda.
- Elə həmin vaxtda sizin üçün doğma olan “Neftçi” klubunun 70 illiyinin təmtəraqlı qeyd olunacağı, tədbir keçiriləcəyi gözlənilir...
- Məni həmin tədbirə dəvət etsələr, gələrəm. /APA-Sport/