Döyüş növləri

Döyüş növləri

“MKT-Araz” İqor Nakoneçnıya kompensasiya ödəyib

14 avqust 2007 11:34 (UTC +04:00)

XVI Azərbaycan çempionatında çıxışını dayandıran “MKT-Araz” klubunun rəhbərliyi baş məşqçi İqor Nakoneçnı ilə əməkdaşlığı dayandırmasına görə kompensasiya ödəyib. Bu barədə “APA-Sport” agentliyinə məlumat verən İ.Nakoneçnının sözlərinə görə, iki il birgə çalışdığı klub rəhbərliyi ilə problem olmadan ayrılıb. Kompensasiyanın konkret məbləğini açıqlamayan ukraynalı mütəxəssis ona qarşı münasibətdən razı qaldığını söyləyib: “Bakıda olduğum müddətdə “MKT-Araz” rəhbərliyi ilə görüşüm olub. Hər şey yüksək səviyyədə idi. Başda klub prezident İkram Kərimli olmaqla, “MKT-Araz” rəhbərliyinə minnətdarlığımı bildirirəm. İki ildir bir yerdə işlədiyim klub rəhbərliyi ilə aramızda heç bir problem yoxdur. Komanda mənimlə müqavilənin pozulmasının qarşılığını ödədi”. İ.Nakoneçnı XVI Azərbaycan çempionatının ilk turunda rəhbərliyi altında çıxış edən futbolçuların oyununu izlədiyini vurğulayıb: “Standard-Bakı” “Qəbələ” görüşünü izlədim. Oyun keçirilən stadionun qazonu pis vəziyyətdə idi. Belə meydançada futbol oynamaq düzgün deyil. Bu, matçın keyfiyyətinə öz mənfi təsirini göstərir. Konkret futbolçuların oyunlarını izləmədiyimdən, fikir yürüdə bilmərəm”.
Qeyd edək ki, İsmət Qayıbov adına Bakıxanov qəsəbə stadionunda keçirilən qarşılaşmada “MKT-Araz”ın futbolçularından qapıçı Vitali Kovalyov, yarımmüdafiəçi Kamal Quliyev, moldovalı hücumçu Anatoli Doroş “Standard-Bakı”nın, yarımmüdafiəçilər Camal Məmmədovla Azər Cabbarov “Qəbələ”nin heyətində çıxış edib. /APA-Sport/