Döyüş növləri

Döyüş növləri

Eldar İsmayılov: “Banişevskinin xatirə turnirini təşkil etməklə, sanki xeyli cavanlaşdım”

15 avqust 2007 09:19 (UTC +04:00)

- Yəqin ki, Banişevskinin xatirə turnirini təşkil edərkən, adi idman yarışı keçirmək istəyinizlə kifayətlənməmisiniz...
- Hazırkı çətin dövrdə böyük futbolçu olmaq arzusuna düşən uşaqlar Yaşin, Streltsov, Banişevski, Bışovets, Bloxin kimi dahilərdən nümunə götürməli olurlar. Düzü, bir neçə il Banişevskinin xatirə turnirini keçirmək arzusu ilə yaşamışam. Şadam ki, turnir baş tutdu. “Severnı” stadionunun meydançasında görmək istədiyimiz komandaların hamısı dəvətimizi qəbul etdilər. Bu turniri veteranlar və gənclərlə yanaşı, uşaqlar arasında da keçirdik. Gənclər və veteranlar kimi, uşaqları da mükafatlandırdıq. Bu turniri keçirməkdə məqsədimiz odur ki, mükafat alan uşaqlar sovet futbolunu şərəfləndirmiş futbolçulardan örnək götürsünlər.
- Azərbaycandan kənarda azərbaycanlının xatirə turnirini təşkil etməkdə hər hansı çətinliklə üzləşmədiniz?
- Əlbəttə, belə turniri təşkil edərkən, müəyyən problemləri də dəf etməyi bacardıq. Nijeqorodsk vilayətinin qubernatoru Valeri Şantsevə xüsusi minnətdarlığımı bildirmək istərdim. O, təklifimizi alqışladı, yarış iştirakçılarına təbriklərini göndərdi. Banişevski çıxış etdiyi komanda yoldaşları ilə birgə sovet idmanına ən böyük şərəf gətirib. O, 1966-cı ildə keçirilən dünya çempionatında indiyədək keçmiş SSRİ-nin və ondan ayrılan respublikaların əldə edə bilmədikləri 4-cü yeri tutub. Banişevski sovet futbolunun fəxridir, buna görə də belə diqqətə layiqdir. 10 ildir aramızda olmasa da, eyni komandada çıxış etmiş futbolçular onu hər zaman xoş xatirələrlə yad edəcəklər.
- Maliyyə məsələlərini necə həll etdiniz?
- Sizə kiçik sirr aça bilərəm ki, belə turnir təşkil etmək maddi baxımdan çətindir. Bu baxımdan, Nijeqorodsk vilayətindəki azərbaycanlıların Regional Milli-Mədəni Muxtariyyətini təmsil edən bütün həmyerlilərimə təşəkkür edirəm. Onlar bu təşəbbüsü dərhal dəstəklədilər və səfər, təşkilati işlər və mükafatlandırma ilə bağlı bütün xərcləri öz üzərlərinə götürdülər. Bununla da həmvətənlərimiz dahi futbolçuya hörmətlərini təmənnasız ortaya qoyduqlarını bildirdilər.
- Deməli, Banişevskinin xatirə turniri təşkil etmək arzunuzu reallaşdırmaq üçün sizə az müddət lazım gəlməyib...
- İdeya üç il öncə ortaya çıxmışdı. Lakin üç il sonra biz bu ideyanı reallaşdırdıq. Bu da məni sevindirir. Özüm əvvəllər idmançı olmuşam. Rusiyanın əməkdar bədən tərbiyəsi işçisi, ümumittifaq və Rusiya kateqoriyalı hakiməm. Futbolçu kimi çıxış etdiyim vaxtlarda Nijni-Novqorod komandasının qapısını qorumuşam. Uzun fasilədən sonra yaşıl meydana ayaq basarkən, gəncliyimi xatırladım. Futbol turniri təşkil etmək arzum reallaşandan sonra sanki xeyli cavanlaşdım. Hansı komandanın qalib gəlməsi və ya məğlubiyyətlə üzləşməsindən asılı olmayaraq, Azərbaycan və Rusiya xalqları arasındakı dostluğa müəyyən töhfə verdik. /APA-Sport/