Döyüş növləri

Ana səhifə

Döyüş növləri

Mahmad Xabibullayev: “Azərbaycan üzərində qələbə məşqçilik karyeramda ən böyük uğurum olacaq”

15 avqust 2007 13:53 (UTC +04:00)

“Diniyev Tacikistan futbolunun lazımi səviyyədə olmadığını deməklə, yanılır”

Avqustun 22-də Düşənbədə Azərbaycan yığmasının rəqibi olacaq Tacikistan milli komandasının baş məşqçisi Mahmad Xabibullayevin “APA-Sport” agentliyinə eksklüziv müsahibəsi

- Azərbaycan yığması ilə yoldaşlıq görüşü keçirmək variantını necə qəbul etdiniz?
- AFFA rəhbərliyinə və Azərbaycan milli komandasının baş məşqçisinə bizimlə yoldaşlıq görüşünə razılıq verdiyi üçün minnətdarlığımı bildirmək istəyirəm. Məsələ ondadır ki, biz Asiya Kuboku turnirindən öncə Səudiyyə Ərəbistanı ilə yoldaşlıq görüşü keçirməyi planlaşdırsaq da, bu, müxtəlif səbəbdən baş tutmadı. Belə olan halda, Azərbaycan yığmasının avqustun 22-də Düşənbədə oynamağa razılıq verməsi bizim üçün göydəndüşmə oldu.
- Tacikistan yığması bir ildir oyun keçirmir. Bunun səbəb nədir?
- Düzdür, bir ildir oyun keçirmirik. Uzun fasilədən sonra ilk görüşümüz Səudiyyə Ərəbistanı ilə olmalı idi. Ancaq son anda bizimlə qarşılaşmaqdan imtina etdilər. Uzun müddət oyun keçirməməyimizin əsas səbəbi baş məşqçi ilə bağlı yaranan problem idi. Belə ki, məndən əvvəlki baş məşqçi postundan getmək istəmirdi. Belə olan halda, təyinatım xeyli müddət yubandı və oyun keçirməklə bağlı razılıq əldə edə bilmirdik. Artıq belə problem yoxdur. Agentlərimə yoldaşlıq görüşlərində rəqib axtarmaqla bağlı tapşırıq vermişəm. Azərbaycanla oyundan sonra ikinci yoldaşlıq görüşümüz sentyabrın 8-də Qazaxıstan yığması ilə olacaq. Bu matçın səfərdə, Qazaxıstanın yeni paytaxtı Astanada keçirilməsi nəzərdə tutulub.
- Azərbaycan yığması haqda hansı məlumatlarınız var?
- Müəyyən informasiyaya malikik. Elə bu gün yığmanızın oyunu ilə bağlı müzakirə apardıq. Milliniz Avropa çempionatının seçmə mərhələ oyunlarında iştirak edir. Finlandiya üzərində qələbə qazandığınızı bilirik. Son rəsmi oyunlarınızı Bakıda Polşa, səfərdə Qazaxıstanla keçirmisiniz. Polşaya 1:3 hesabı ilə məğlub olub, Qazaxıstanla 1:1 hesablı bərabərliyə qalmısınız. Millinizdə son oyunlarda iki əcnəbi futbolçu çıxış edib. Bunlar ukraynalı və serbiyalıdır. Serbiyalı Polşa ilə oyunda hesabı açaraq, komandanızın yeganə qolunun müəllifi olub. Millinizdə braziliyalı futbolçuların da çıxış etməsini bilirəm.
- Milli komandamızın konkret hansı oyununu görmüsünüz?
- Bizdə son oyunların fraqmentlərindən ibarət kaset var. Onu da deyim ki, Azərbaycan Avropada müxtəlif turnirlərdə çıxış etdiyindən, səviyyəsinə görə Tacikistandan üstündür.
- Düşənbədə Tacikistanla keçiriləcək görüşdə Azərbaycanı favorit saymaq olarmı?
- Oyunun öz meydanımızda keçirilməsi bizim əsas üstünlüyümüzdür. Üstəlik, Azərbaycanla oyun Tacikistanın baş məşqçisi kimi ilk matçım olduğundan, çox vacibdir. Ən əsası, bu yoxlama oyunudur. Mən də futbolçularımı nəzərdən keçirmək istəyirəm. Millinizlə görüş Asiya kuboku turnirinə hazırlığın bir mərhələsidir. Hesab edirəm ki, Azərbaycanla görüş çox maraqlı olacaq. Üstəlik, Tacikistan bir ildir oynamamağı milli komandanızla görüşün marağını artırır.
- Hansı yığma komandanın qələbə qazanmaq şansı daha çoxdur? Tacikistan-Azərbaycan oyununa proqnoz vermək istərdiniz?
- Proqnoz verməyi xoşlamıram. Üstəlik, bu, rəsmi yox, yoldaşlıq görüşü olacaq. Belə matçlarda proqnoz vacib deyil. Amma Azərbaycanla oyuna qələbə qazanmaq üçün çıxacağıq. Dediyim kimi, yığmada baş məşqçi kimi, ilk oyunum olduğundan, Azərbaycan üzərində qələbə məşqçilik karyeramda ən böyük uğur olacaq.
- Azərbaycan milisinin baş məşqçisi Şahin Diniyev barədə məlumatınız var?
- Bir müddət əvvəl Diniyevin Azərbaycan mətbuatına verdiyi müsahibəni oxudum. Belə başa düşdüm ki, o, Tacikistanı ciddi rəqib saymır. Diniyev Tacikistan futbolunun lazımi səviyyədə olmadığını deyib. Ancaq fikirləşirəm ki, Diniyev yanılır. Tacikistanla görüşdə bunun şahidi olacaq, futbolunuzun əsl səviyyəsini biləcək. Millimizin ən layiqli oyununu göstərmək istəyirəm. Yəni, Azərbaycanın qarşılaşdığı Qazaxıstandan zəif olmadığımızı sübut etmək fikrindəyik. Hesab edirəm ki, yığmanız Qazaxıstanla səfər oyununda uğurlu çıxış edib. Hər halda, Azərbaycan rəqib meydanında hesabda irəlidə olduğu halda, qələbəni əldən verdi.
- Azərbaycan bu il Orta Asiya ölkələrinin yığmaları ilə qarşılaşıb. Yəni, Qazaxıstanla yanaşı, Özbəkistan və Qırğızıstan milliləri ilə də...
- Bu haqda məlumatlıyam. Mən yığmanızın oyunlarını kasetə köçürüb, heyətlə bağlı qeydiyyat aparmışam. Azərbaycanın bizimlə görüşə heyətinin açıqlanmasını gözləyirəm. /APA-Sport/