Döyüş növləri

Döyüş növləri

Ramal Hüseynov: “Milli komandada oynamaqdan imtina etməmişəm”

15 avqust 2007 16:20 (UTC +04:00)

“Milli komandada oynamaqdan imtina etməmişəm”. “APA-Sport” agentliyinin məlumatına görə, bu sözləri “Bakı” klubunun yarımmüdafiəçisi Ramal Hüseynov deyib. Yığma komandada oynamaqla bağlı heç bir probleminin olmadığını vurğulayan R.Hüseynovun sözlərinə görə, milliyə hər zaman kömək etməyə hazırdır: “Vaxtilə olimpiya yığmasının şərəfini qoruyurdum. Çoxları mənim millidən imtina etdiyimi, mili komandanın rəhbərliyi ilə şəxsi münasibətlərimin pis olmasını iddia edir. Lakin bir daha bəyan edirəm: nə Şahin Diniyevlə, nə də futbolçularla problemim var. Nə zaman milliyə dəvət etsələr, bunu şərəf sayıb, Azərbaycan üçün bacardığımı edəcəyəm”. R.Hüseynov hazırkı komandasında ilk qırmızı vərəqəni XVI Azərbaycan çempionatının ilk turunda alıb. “Gənclərbirliyi” ilə oyunda bir dəqiqəyə iki sarı vərəqə aldığı üçün meydandan qovulan yarımmüdafiəçi baş hakim Eldar Nağıbəyovun qərarına narazılıq edib: “Qırmızı vərəqəyə görə çoxları məni tənqid edir. Bir şeyi başa düşmürlər ki, mən bilə-bilə qırmızı vərəqə almamışam. Sadəcə, həmin epizodda əsəblərimi cilovlaya bilmədim. Cəzalandığımdan ikinci turda “Qəbələ” ilə oyunda meydana çıxmayacağam. Bu görüş çox ağır keçəcək. “Qəbələ” ilk turda səfərdə qələbə qazandığından, komandada əhval-ruhiyyə yüksəkdir. Digər tərəfdən, matç Qəbələdə baş tutacaq. Bununla belə, komanda yoldaşlarımın mənim yoxluğumu unutduracağıma əminəm. Fikrimcə, ötən illə müqayisədə daha da güclənmişik. “Bakı” bu mövsüm istədiyinə nail olacaq”. /APA-Sport/