Döyüş növləri

Ana səhifə

Döyüş növləri

Şahin Diniyev: “Klublarımız mərhələ adlaya bilmədisə, nəticədən danışmaq əbəsdir”

17 avqust 2007 13:18 (UTC +04:00)

Azərbaycan yığma komandasının baş məşqçisi Şahin Diniyevin avqustun 22-də Düşənbədə Tacikistanla keçiriləcək yoldaşlıq görüşü ilə bağlı AFFA-nın rəsmi internet səhifəsinə müsahibəsi

- İlk növbədə rəqiblə bağlı hər hansı məlumatınızın olub-olmaması barədə fikirlərinizi bilmək istərdik”¦
- İstənilən rəqibə hörmətlə yanaşırıq. Tacikistan yığması məhz bizimlə oyuna hazırlaşmaq məqsədilə Türkiyədə 10 günlük təlim-məşq toplanışı keçirib. Hesab edirəm ki, çətin oyun olacaq. Çünki Tacikistan yığmasının yeni baş məşqçisi üçün bu oyun müəyyən mənada özünüsübut baxımından çox əhəmiyyətlidir.
- Təqvimdə nəzərdə tutulmuş xüsusi gündə - avqustun 22-də yoldaşlıq görüşü keçirmək üçün rəqib axtarışı niyə bu qədər uzun çəkdi?
- Bununla bağlı bəzi mətbu orqanlarda reallığı əks etdirməyən fikirlərə rast gəldik. Guya rəqib axtarışı vaxtında başlanmayıb, yaxud AFFA tərəfindən məsələyə barmaqarası yanaşılıb və sair. Əslində, vəziyyət belə deyildi. İş ondadır ki, AVRO-2008-in seçmə mərhələsində millimizin çıxış etdiyi qrupun oyunlarının təqvimi müəyyənləşdirilərkən avqustun 22-də Polşa yığması ilə qarşılaşmağımız nəzərdə tutulmuşdu. Lakin sonradan bu oyunun vaxtı dəyişdirildi və məhz buna görə avqustun 22-də yoldaşlıq görüşü üçün rəqib tapmaqda müəyyən çətinliklə üzləşdik. Ancaq məsələ müsbət həllini tapdı.
- Tacikistan millisinin baş məşqçisi açıqlama verərək komandasının heç də zəif olmadığını bildirib. Rəqibimizin millimizdən zəif olması barədə fikirləri nəyə əsasən səsləndirmişdiniz?
- Mən belə açıqlama verməmişəm. Ümumiyyətlə, hansısa komandanı zəif hesab etməyimlə bağlı indiyə qədər bir dəfə də fikir bildirməmişəm. Bu, mənim xarakterimə ziddir. İstənilən rəqibə hörmətlə yanaşıram. Portuqaliya yığmasının baş məşqçisi öz güclərinə yaxşı bələd olduğu halda Azərbaycan millisi ilə oyundan əvvəl qalib gələcəklərinə əmin olmadığını bildirirsə, bizim hansısa komandanı zəif adlandırmağa nə haqqımız var? Bu, ən azı etik normalara zidd olardı.
- Bu məsələ həmişə müzakirə mövzusu olub və bu dəfə də istisna deyil. Söhbət millimizin Avropa deyil, Asiya komandası ilə yoldaşlıq görüşü keçirməsindən gedir. Fikrinizcə, Tacikistan yığması ilə oyun komandamıza nəsə qazandıra biləcəkmi?
- Burada vacib olan nəticə deyil, komandadakı çatışmazlıqların müəyyənləşdirilməsidir. Ümumiyyətlə, futbolun qitələrə bölünməsi ilə razı deyiləm. Dünyanın hər yerində futbolu eyni oyun qaydalarına əsasən oynayırlar. Bu baxımdan, Avropa, Asiya, yaxud Afrika komandası ilə qarşılaşmağın bir-birindən köklü surətdə fərqlənməsi və yaxud millimizə faydasız olacağı ilə bağlı fikirlərlə razı deyiləm.
- Klublarımızın avrokuboklardakı çıxışlarını izlədinizmi?
- Əlbəttə.
- Sizcə, nəticələr qanunauyğun idimi?
- Klubların çıxışına qiymət vermək fikrində deyiləm. Tarixdə nəticə qalır. Əgər klublarımızın heç biri mərhələ adlaya bilmədisə, nəticədən danışmaq əbəsdir. Amma bir məqamı qeyd etmək istəyirəm ki, klublarımızın oyununda irəliləyiş hiss olunur.
- Klublarımızın sərfəli hesabları son dəqiqələrdə əldən verməsi futbolçuların fiziki hazırlığının aşağı olması ilə əlaqələndirildi. Həmin klublardan milliyə dəvət alan futbolçuların fiziki hazırlıq səviyyəsi sizi nə dərəcədə narahat edir?
- Klublarımızın avrokubok oyunlarında maraqlı məqamlardan biri də, demək olar ki, bütün qarşılaşmalarda oxşar hadisələrin yaşanması idi. Son dəqiqələrdə qol buraxılması, futbolçuların qırmızı vərəqə alması və sair. Fiziki hazırlıq məsələsinə gəlincə, futbolda bunu ustalıqla “sığortalamaq” mümkündür. Bütün çatışmazlıqların aradan qaldırılmasına çalışacağıq.
- Heyətdə İlqar Qurbanovun adına rast gəlmədik. Bunun səbəbi nədir?
- İlqar mənə zəng vuraraq avqustun 23-də klubunun heyətində vacib oyuna çıxmalı olduğunu bildirdi və bu toplanışa çağırılmamasını xahiş etdi. Klubunun heyətində möhkəmlənməsinə imkan yaratmaq üçün açıqladığımız siyahıya İlqar Qurbanovun adını daxil etmədik. Bundan əlavə, Vüqar Nadirovu və Vaqif Cavadovu U-21-ə yardımçı ola bilmələri üçün milliyə çağırmamışıq.
- Samir Əliyevin yenidən milliyə çağırılması da diqqət çəkən məqamlardandır”¦
- Samirin UEFA Kuboku çərçivəsində keçirilən oyunlardakı çıxışı məndə xoş təəssüratlar oyatdı. Buna görə, onu yenidən milliyə dəvət etdik.
- Amma Samir Əliyev bundan əvvəlki dəvətinizi müsbət dəyərləndirməmişdi”¦
- Bəli. Ötən dəfə Samir Əliyev fiziki hazırlığının aşağı səviyyədə olmasını bildirdi və millidə çıxış etməyə hazır olmadığını dedi. Onun bu addımı peşəkar futbolçuya yaraşan hərəkət idi. Mən ona inandım və təşəkkürümü bildirdim. Çünki məşqçi ilə futbolçu arasında qarşılıqlı inamın olması vacib amildir. Hazırda Samirin hazırlıq səviyyəsi ötən mövsümə nisbətən daha yüksəkdir.
- Heyətə cəmi iki qapıçı dəvət etmisiniz. Perspektivli qapıçılardan daha birini ən azı özünəinam hissini artırmaq üçün bu toplanışa cəlb etmək olmazdımı?
- Qarşıdakı toplanış qısamüddətlidir bir məşq və bir oyundan ibarətdir. Buna görə iki qapıçı ilə kifayətlənməli olduq. Qarşıdakı təlim-məşq toplanışlarında perspektivli qapıçılarımızı millinin düşərgəsinə dəvət etməyi düşünürük.
- Murad Ağakişiyevin də milliyə dönüşü diqqətdən yayınmır”¦
- “Simurq” - “Qarabağ” oyununu Murad yüksək səviyyədə keçirdi. Buna görə, ona özünü millidə göstərmək üçün daha bir şans verdik. Millinin hər bir oyunçusu yüksək peşəkarlığı ilə digərlərinə nümunə olmalıdır. Heç kimə qarşı kin saxlamamalı və keçmişdə baş verən xoşagəlməz halları unudub inkişaf etməliyik. /APA-Sport/