Döyüş növləri

Döyüş növləri

Saşa Yunisoğlu: “Qrotslin”lə müqayisədə, Azərbaycan klublarında futbolçulara daha çox pul verilər”

22 avqust 2007 10:37 (UTC +04:00)

Futbol üzrə Azərbaycan milli komandasının və Polşanın “Qrotslin” klubunun müdafiəçisi Saşa Yunisoğlunun “APA-Sport” agentliyinə eksklüziv müsahibəsi

- Özünü necə hiss edirsən?
- Hər şey yaxşıdır. Mən peşəkar futbolçu olduğum üçün istənilən ölkədə oynamağa hazıram. Düzdür, hazırda yad ölkədəyəm. Burada heç bir tanışım yoxdur. Özümü yaxşı hiss edirəm.
- “Qrotslin”lə müqavilənin şərtləri səni qane edirmi?
- Dünən iki illik müqaviləyə imza atdım. Şərtlər məni qane edir. Amma maddi baxımdan Azərbaycanda bundan yaxşıdır.
- Müqavilənin maddi dəyərini açıqlaya bilərsənmi?
- Yox, bunu deməyə haqqım yoxdur. Bizim komandalarla müqayisədə, “Qrotslin”də futbolçulara daha az əməkhaqqı verirlər.
- Bəs nəyə görə “Qrotslin”də oynamağa razılaşdın?
- Mən perspektivi nəzərə aldığım üçün “Qrotslin”lə anlaşdım. Azərbaycan vətənimdir, orada mənim həmişə yerim var. Ancaq belə şans bir dəfə yaranır və bunu əldən vermək istəmədim.
- Adətən libero mövqeyində oynayasan da, keçmiş klubun “MKT-Araz”da sağ cinah müdafiəçisi kimi çıxış edirdin. Yeni komandada hansı mövqedə oynayacaqsan?
- “Qrotslin”in heyətində ilk məşqə bu gün çıxacağam. Bu komandada xətti müdafiə sistemi tətbiq olunur. Hər şey baş məşqçidən asılıdır. O, hansı mövqedə oynamağımı məsləhət bilsə, orada da yer alacağam. Ola bilsin ki, mərkəz müdafiəçisi kimi çıxış edim.
- Baş məşqçi Yatsek Jelinski ilə fərdi söhbətin olubmu?
- Bəli, biz öz aramızda danışmışıq. O, mənə dedi ki, biz sənə güvəndiyimizdən komandaya dəvət etmişik. Baş məşqçi mənə çox inanır.
- Bildiyimizə görə, “Qrotslin”in Polşa çempionatının son turunda “Belçatov”la oyununu izləmisən. Yeni komandan barədə hansı təəssüratların var?
- Komanda çox yaxşı təsir bağışladı. Sürətli futbol oynayır. Bundan başqa, Polşa çempionatı Azərbaycan birinciliyindən ikiqat güclüdür. Burada həm oyun quruculuğu, həm azarkeşlər, həm də peşəkarlıq tam fərqlidir. Azərbaycanda yalnız “Xəzər-Lənkəran” və “Karvan”ın oyunlarına belə çox azarkeş gəlir.
- Polşa çempionatının növbəti turunda meydana çıxa biləcəksən?
- “Qrotslin”in qarşıdakı matçına 3-4 gün qalıb. Amma mən bir məşqdə də iştirak etməmişəm. Buna görə də, Polşa çempionatının növbəti turunda oynayıb-oynamayacığımı dəqiq bilmirəm. Baş məşqçi mənə şans versə, ümidləri doğruldacağam.
- Əsas heyətə düşmək sənə çətin olmayacaq ki?
- Açığı, komanda yoldaşlarımın gücünə tam bələd deyiləm. Buna baxmayaraq, əsas heyətdə yer almağa çalışacağam.
- Müqavilədə milli komanda ilə bağlı bənd var? “Qrotslin” yığmaya gəlməyinə problem yaratmayacaq ki?
- Yığmadan təklif gələcəyi təqdirdə, klub rəhbərliyi mənə maneçilik törətməyəcək. Təki Şahin Diniyev məni milli komandaya dəvət etsin. “Qrotslin” rəsmiləri məni yığmaya sərbəst buraxacaqlarına söz veriblər.
- Müqavilə bağladıqdan sonra, Azərbaycandan səninlə əlaqə saxlayan olubmu?
- Xeyr. “Qrotslin”lə müqavilə bağladıqdan sonra, ilk müsahibəni sizə verirəm. /APA-Sport/