Döyüş növləri

Döyüş növləri

Yaşar İbrahimov: “Turan” çempionatdan imtina edə bilər”

22 avqust 2007 14:33 (UTC +04:00)

Tovuzun “Turan” futbol klubunun prezidenti Yaşar İbrahimov AFFA Hakimlər Komitəsinin sədri Murad Məmmədova müraciət edib. “APA-Sport” agentliyinin məlumatına görə, məktubda avqustun 19-da XVI Azərbaycan çempionatının ikinci turu çərçivəsində keçirilmiş “Turan” “Olimpik” (1:3) matçında hakimlərin idarəçiliyinə etiraz ifadə olunub. Sənəddə bildirilib ki, Tovuz komandası məhz hakimlər briqadasının səhvləri ucbatından məğlubiyyətə düçar olub: “Hakimlər oyun boyu qonaq komandanın xeyrinə qərarlar qəbul edirdi. “Turan”ın 14-cü dəqiqədə vurduğu ikinci qolun qeydə alınmaması qarşılaşmanın taleyini həll etdi. “Olimpik”in fərqləndiyi epizodda isə topun rəqib futbolçudan meydanı tərk etməsinə baxmayaraq, hakim “Turan”ın qapısına künc zərbəsi təyin etdi. Bu səhv qərardan sonra qapımıza qol vuruldu”. Y.İbrahimov vurğulayıb ki, stadionda daha böyük qalmaqal yaranması ehtimalı olub: “Hakimlərin səhvlərindən sonra azarkeşlər meydana kənar əşyalar atdılar. Stadionda rayon rəhbərliyi və millət vəkilləri olmasaydı, hakimlərin qərəzli mövqeyinə qarşı etirazlar daha böyük fəsadlar törədə bilərdi”. Məktubda “Turan”ın cərimələnməsinə hakimlər baiskar göstərilib. Sənəddə qeyd olunub ki, komanda rəhbərliyi AFFA-nın qərarlarına hörmətlə yanaşır: “Bununla yanaşı, biz matçın baş hakimi Ceyhun Haşımovun cəmi 5 oyunluq cəzalanmasını qəbul edə bilmirik. Ceyhun Haşımovun daha böyük cəzaya layiq idi. Belə prinsipial və görüşlərə səriştəsiz və qərəzli hakimlər təyin olunursa, bu işdə Hakimlər Komitəsi özü də günahkardır”. Y.İbrahimov sonda bildirib ki, “Turan”a qarşı haqsızlıqlar davam edəcəyi təqdirdə, komanda milli çempionatda çıxışını dayandıracaq: “Komandamız qərəzli hakimlərin qurbanına çevriləcəksə, biz milli çempionatda çıxışımızı dayandıracağıq. Eyni zamanda, ölkə prezidentinə, UEFA-ya, AFFA rəhbərliyinə və bütün klublara məktublar ünvanlayacağıq”. /APA-Sport/