Döyüş növləri

Döyüş növləri

AFFA Aleks Ferqyussonla Fatih Terimi Bakıya dəvət etmək istəyir

27 avqust 2007 10:04 (UTC +04:00)

Azərbaycan Futbol Federasiyaları Assosiasiyasının (AFFA) rəhbərliyi Bakıda 7 ölkənin məşqçilərinin iştirakı ilə beynəlxalq seminar keçirməyi planlaşdırır. Bu barədə “APA-Sport” agentliyinə AFFA-nın elmi-metodik mərkəzinin rəhbəri Rafiq Bağırov məlumat verib. Onun sözlərinə görə, beynəlxalq seminarın təşkili üçün yaxın günlərdə UEFA-ya müraciət olunacaq: “Bu ideya AFFA-nın baş katibi Elxan Məmmədov tərəfindən irəli sürülüb. Seminara ölkəmizlə yanaşı, Gürcüstan, Türkmənistan, Tacikistan, Ukrayna, Moldova və Bolqarıstandan məşqçilərin qatılmasını nəzərdə tutmuşuq. Bu tədbiri keçirməklə, UEFA-ya seminar təşkil etmək bacarığımızı göstərmək niyyətindəyik”. R.Bağırov bildirib ki, seminarda Avropanın nüfuzlu iki məşqçisinin Aleks Ferqyusson (“Mançester Yunayted”) və Fatih Terimin (Türkiyə yığması) də iştirakı gözlənilir: “UEFA-nın təlimatçısı Zdenek Siveklə də məsləhətləşmələr aparacağıq. Seminara Aleks Ferqyussonla Fatih Terimi dəvət etmək istəyirik. Onları məşqçilərə mühazirə oxumaq üçün Bakıya çağırmağı məqsədəuyğun sayırıq”. AFFA rəsmisi vurğulayıb ki, paytaxtımızda gələcəkdə “Pro” kateqoriyalı məşqçilik kurslarının keçiriləcəyi istisna deyil: “Beynəlxalq seminarın ardından “Pro” kateqoriyalı kursları təşkil etməyi planlaşdırmışıq. Bu, daha çox beynəlxalq seminarı necə keçirəcəyimizdən asılı olacaq. Seminar uğurla təşkil olunacağı təqdirdə, UEFA “Pro” kateqoriyalı kursları keçirməyi bizə etibar edəcək”. /APA-Sport/