Döyüş növləri

Ana səhifə

Döyüş növləri

Vlastimil Petrjela: “Zenit”dən sonra “Neftçi “yə keçidim geriyə addım deyil”

28 avqust 2007 14:22 (UTC +04:00)

- Cənab Petrjela, necə oldu ki, “Neftçi” klubuna baş məşqçi təyin olundunuz?
- Məni Bakıya klubun rəhbərliyi dəvət etdi.
- Baş məşqçi postunu Sizə konkret kim təklif edib?
- “Neftçi”nin prezidenti və vitse-prezidenti.
- Rəhbərlik qarşınıza hansı vəzifəni qoyub?
- Bildiyimə görə, “Neftçi” ölkənin ən güclü klubudur. Təbii ki, rəhbərlik komandanı daha da inkişaf etdirməyimi istəyir. Amma bu, futboldur və gələcəkdə hər şey baş verə bilər.
- Müqavilənin şərtləri Sizi qane edirmi? Ümumiyyətlə, “Neftçi” rəhbərliyi Sizə nə qədər pul ödəyib?
- İlkin olaraq, bir illik müqavilə bağlamağa razılıq verdim. Hərçənd, “Neftçi” rəsmiləri daha uzun müddətli müqavilə imzalamağı istəyirdilər. Amma bununla razılaşmadım. Gələcəkdə anlaşmanın vaxtını artıracağımız istisna deyil. Müqavilənin maddi dəyərini isə deyə bilmərəm.
- Razılaşmanın maddi dəyəri müəyyənləşdirilməyib ki?
- Məni düzgün başa düşmədiniz. Müqavilənin maddi dəyəri bilinir. Ancaq bu rəqəmi jurnalistlərə deməyəcəyəm.
- Axı, belə şeylər gizlədilmir və əksər hallarda ictimaiyyətə açıqlanır.
- Yox, mən müqavilənin maddi dəyərini açıqlamaq fikrində deyiləm.
- Nəyə görə, məhz “Neftçi”də işləməyə razılaşdınız?
- Mənə digər klublardan da təklif göndərilmişdi. Amma Azərbaycanda çalışmaq qərarına gəldim. “Neftçi” rəsmiləri tez-tez mənə zəng vururdular. Onlar məni Bakıya - “Neftçi”nin oyununu, Azərbaycan futbolunu izləməyə dəvət edirdilər. Bakıya gələrək, həm “Neftçi” rəhbərliyi ilə danışıqlar apardım, həm də komandanın oyununa baxdım. Qeyd etməliyəm ki, “Neftçi” bir az fərqli oyun göstərir. İstəyirəm ki, “Neftçi” mənim keçmiş komandam “Zenit”in oyun üslubunda çıxış etsin.
- Demək istəyirsiniz ki, “Neftçi” hazırda pis oyun nümayiş etdirir?
- Elə demək istəmədim. Bakıda olarkən “Neftçi”nin bir oyunu izlədim. Komanda haqqında ilk təəssüratlarım yaxşıdır. Heyətdə gənc, texnikalı, ağıllı futbolçular var. Xətlərarası əlaqə qənaətbəxşdir. Lakin “Neftçi”nin futbolçuları bir az çox qaçmalıdırlar, sürətli oynamalıdırlar. Bəzi epizodlarda komandanın üzvləri qol şansı yaxalasalar da, bundan yararlana bilmirdilər.
- Qeyd etdiyiniz kimi, başqa komandalardan da Sizə təklif gəlib. Bilmək olar, Sizinlə hansı klublar maraqlanırdılar?
- Çoxlu təkliflər almışdım.
- Məsələn...
- Bu günlərdə Rumıniyanın “Universitatya Krayova” klubu mənə baş məşqçi postunu təklif etmişdi. “Universitaya Krayova”nın prezidenti ilə də görüşüm oldu. Amma sonda razılığa gələ bilmədik. Buna heç də pulun azlığı səbəb olmadı. Sadəcə, rumıniyalılar “Neftçi”dən gec tərpənmişdilər.
- “Neftçi”nin hazırkı məşqçiləri ilə işləyəcəksiniz, yoxsa özünüzə yeni köməkçilər götürəcəksiniz?
- Komandaya yeni bir məşqçi dəvət etməyi nəzərdə tutmuşam. Bunun kim olacağı hələ bilinmir. Bu, rusiyalı, ukraynalı və ya çexiyalı məşqçi ola bilər. Çoxları mənimlə işləmək istəyirlər. Lakin hələ seçimimi etməmişəm.
- Bakıya gəlməmişdən öncə Azərbaycan futbolu haqqında məlumatınız var idi?
- Açığı, Azərbaycan futbolu haqda elə də məlumatlı deyildim. Bakıya səfərimdən əvvəl yalnız “Neftçi”ni tanıyırdım. Azərbaycana səfərim zamanı ölkə çempionatının iki oyununu izlədim. Oyununa baxdığım komandalar texnikalı kollektiv təəssüratı bağışladılar.
- Siz əvvəllər “Zenit”in baş məşqçisi vəzifəsində çalışmısınız. Rusiya klubundan sonra “Neftçi”yə keçidinizi geriyə addım kimi qiymətləndirmək olar?
- Heç vaxt bunu geriyə addım kimi dəyərləndirmərəm.
- Azərbaycana nə vaxt qayıdacaqsınız? “Neftçi” milli çempionatın növbəti turuna Sizin rəhbərliyiniz altında çıxacaqmı?
- Bakıya sentyabrın 1-də dönəcəyəm. Çünki tezliklə yeni komandamın ilk oyununda iştirak etmək istəyirəm. “Neftçi”ni “İnter”lə qarşılaşmaya mən özüm çıxaracağam. /APA-Sport/