Döyüş növləri

Döyüş növləri

Milli dərəcəli hakim Ramiz Əhmədov “Olimpik” klubundan üzr istəyəcək

29 avqust 2007 11:43 (UTC +04:00)

“AFFA-nın məni cəzalandıracağını gözləmirdim. Bu xəbəri eşidəndə şoka düşdüm”. Bu sözləri “APA-Sport” agentliyinə açıqlamasında milli dərəcəli hakim Ramiz Əhmədov deyib. XVI Azərbaycan çempionatının III turunda “Olimpik” “Gənclərbirliyi” (1:0) matçında buraxdığı nöqsanlar ucbatından 5 oyunluq diskvalifikasiyaya məruz qalan R.Əhmədov matçın videokasetinə baxacağını bildirib: “Bir halda ki, bu qərarı xüsusi komissiya qəbul edib, deməli, bununla razılaşmaq lazımdır. Ancaq hər ehtimala qarşı səhvlərimin olub-olmadığını aydınlaşdırmaq üçün oyunun videokasetinə baxacağam”. Hakim səhvlərin üzə çıxacağı təqdirdə, “Olimpik” rəhbərliyindən üzr istəməyə hazır olduğunu söyləyib: “Oyundan sonra bir çox mütəxəssislərlə söhbətləşmişəm və onlar sarı vərəqələri düzgün verdiyimi deyiblər. Ancaq qol epizodu ilə bağlı nə isə deməyə çətinlik çəkirəm. Videokasetə baxarkən nöqsanlarım üzə çıxarsa, “Olimpik” rəhbərliyindən üzr istəyəcəyəm”. R.Əhmədov AFFA-nın qərarından apelyasiya verib-verməyəcəyini qətiləşdirmədiyini vurğulayıb.
Qeyd edək ki, R.Əhmədov “Olimpik”in şikayəti əsasında cəzalandırılıb. Bakı komandasının rəsmiləri “Gənclərbirliyi” ilə görüşdən sonra hakimin Pate Banqura və Aqil Nəbiyevə əsassız sarı vərəqə göstərməsi, eləcə də Fərrux İsmayılovun 12-ci dəqiqədə vurduğu qolu qeydə almaması barədə matçın protokulunda qeydlər aparıblar. /APA-Sport/