Döyüş növləri

Döyüş növləri

Rusiyalı milyarder İngiltərənin “Arsenal” klubunun səhmlərini alıb

31 avqust 2007 09:15 (UTC +04:00)

Rusiyalı milyarder Alişer Usmanov İngiltərənin “Arsenal” klubunun səhmlərini alıb. “APA-Sport” agentliyinin məlumatına görə, A.Usmanov səhmlərin 14,58 faizini almaqla, klubun sahiblərindən birinə çevrilib. Bu, rusiyalı iş adamına 75 milyon funta (təxminən 150 milyon ABŞ dolları) başa gəlib. A.Usmanov eyni zamanda, “Arsenal”ın səhmlərinin məxsus olduğu “Red and White” şirkətinin rəhbərliyində təmsil olunmaq imkanı qazanıb. O, gələcəkdə fəaliyyətini genişləndirərək, səhmlər paketinin daha çox hissəsini ələ keçirmək fikrində olduğunu söyləyib. Bununla da, A.Usmanov “Çelsi”nin prezidenti Roman Abramoviçdən sonra İngiltərə klublarında səhmlərə sahib ikinci rusiyalı olub. Bundan başqa, Premyer-Liqanın digər 7 komandasının - “Aston Villa” (Rendi Lerner, ABŞ), “Liverpul” (Corc Cillet və Tom Hiks, ABŞ), “Fulhem” (Məhəmməd Əl-Fayed, Misir), “Portsmut” (Aleksandr Qaydamak, İsrail), “Vest Hem” (Eqqert Maqnusson, İslandiya), “Mançester Yunayted” (Malkolm Qleyzer, ABŞ) və “Mançester Siti”də (Taksin Çinavat, Tailand) rəhbərliyində də əcnəbilər yer alıblar. /APA-Sport/