Döyüş növləri

Ana səhifə

Döyüş növləri

Vlastimil Petrjela: “Ürəyimin getməməsi üçün dondurmanı başıma yaxıram”

06 sentyabr 2007 09:04 (UTC +04:00)

“Mənə “Neftçi” klubunun prezidenti zəng vurdu. Sonra Bakıda şəxsən qarşıladı, bir il müddətinə müqavilə təklif etdi. Qəbul olunmağım xoşuma gəldi”. “APA-Sport” agentliyinin məlumatına görə, bu sözləri “Neftçi” klubunun baş məşqçisi Vlastimil Petrjela deyib. Çexiyalı mütəxəssisin sözlərinə görə, “Neftçi” klubundan təklif alanadək heç yerdə işləmirdi və ilin sonunadək fasilə etmək fikrində imiş. Buna səbəb isə onun Rusiyaya ikinci səfərinin son anda pozulması olub: “Mən “Rostov” klubu ilə müqavilə bağlamışdım. Mənim üçün viza açdırıb bilet də almışdılar. Təyyarəyə mindikdə isə klub rəsmiləri mənə zəng edib dedilər ki, komandaya başqa məşqçi gəlib, sən lazım deyilsən”.
“Neftçi” ilə bağladığı müqaviləni özü üçün optimal hesab edən V.Petrjela Azərbaycanda meydançaların pis vəziyyətdə olduğunu, komandaların isə 45 dərəcə istidə oynadıqlarını vurğulayıb. 54 yaşlı baş məşqçinin sözlərinə görə, əvvəlcə belə istidə oynamağın qeyri-mümkünlüyü qənaətinə gəlib: “Amma azərbaycanlılar mənə vəd edirlər ki, iki həftədən sonra 45 dərəcə temperatura öyrəşəcək və istiyə əhəmiyyət verməyəcəyəm. Hələlik kondisioner almamışam. Dondurma ilə keçinirəm. Heç vaxt soyuducumda bu qədər dondurma saxlamamışam. Amma mən dondurma yemirəm. Ürəyim getməməsi üçün dondurmanı başıma yaxıram. Təbii ki, bu, bir zarafatdır”. Qarşısına çempionluq məqsədi qoyulduğunu söyləyən V.Petrjela bunun heç də asan olmayacağını bildirib. Onun fikrincə, problem olan yerdə işləmək maraqlıdır. Çexiyalı mütəxəssis Azərbaycan paytaxtı haqda danışarkən, Bakını Dubaya, avtomobil sürən hər iki sakindən birini isə tanınmış almaniyalı pilot Mixael Şumaxerə bənzədib: “Bakı on ildən sonra gözəl olacaq. Hazırda burada qlobal tikinti gedir. Amma artıq indidən Bakının özünəməxsus imicinin olduğunu demək mümkündür. Dubaya oxşayır. Yerli sakinlər isə avtomobillərini sürətlə sürürlər. Burada hər iki nəfərdən biri Şumaxerdir. Saatda ən azı 150 km sürətlə sürürlər. Qaydalara məhəl qoyan yoxdur. Özüm isə sürücü ilə birgə maşınla təmin olunmuşam”. /APA-Sport/