Döyüş növləri

Ana səhifə

Döyüş növləri

Fuad Əsədov: “Neftçi” cəzalandırıla bilər”

06 sentyabr 2007 15:24 (UTC +04:00)

AFFA prezidentinin müşaviri Fuad Əsədov “Neftçi” klubu rəhbərliyinin futbolçularını Azərbaycan milli komandasına buraxılmamasını mənəvi, vətənpərvərlik baxımından düzgün hesab etməyib. Milli assosiasiyanın sabiq baş katibi “APA-Sport” agentliyinə açıqlamasında bildirib ki, “Neftçi” rəhbərliyini bu addımı yığmanı çətin vəziyyətdə qoyub: “Bu məsələyə mənəvi tərəfdən yanaşsaq, təbii ki, “Neftçi” rəhbərliyinin hərəkətini düzgün saymaq mümkün deyil. Çünki məhz bu komandanın oyunçularına görə hazırda yığmanın düşərgəsində 10 futbolçu var”. Bununla belə, F.Əsədov “Neftçi”nin reqlamenti pozmadığını deyib: “Reqlamentə əsasən, istənilən klub öz futbolçusunu yığmanın düşərgəsinə yoldaşlıq görüşündən 48 saat öncə göndərməlidir. Deməli, reqlament baxımından “Neftçi”yə irad tutmaq olmaz”. AFFA rəsmisi klubun cəzalandırılacağını da istisna etməyib: “Yığma və klub arasında yaranan belə mübahisəli məsələnin üçüncü tərəfi də var. Əgər klub ümumiyyətlə oyunçusunu milli komandaya buraxmazsa, cəzalandırılmalıdır. “Neftçi” öz futbolçularını sentyabrın 10-da da yığmanın məşqlərinə qoşulmasına imkan verməyəcəyi təqdirdə, müəyyən məbləğdə cəzaya məruz qalacaq”.
Qeyd edək ki, mövcud qaydaları əsas gətirən “Neftçi” rəhbərliyi Samir Əliyev, Ramin Quliyev, Ramazan Abbasov, Aleksandr Çertoqanov və Branimir Subaşiçi milli komandamızın sentyabrın 12-də Gürcüstana qarşı keçirəcəyi yoldaşlıq görüşünün hazırlığına buraxmayıb. /APA-Sport/