Döyüş növləri

Ana səhifə

Döyüş növləri

Azərbaycan olimpiya yığması Xorvatiyaya uduzub

12 sentyabr 2007 08:13 (UTC +04:00)

Azərbaycanın olimpiya yığma komandası 2009-cu il Avropa çempionatının seçmə qrup mərhələsi çərçivəsində keçirdiyi üçüncü oyunda da məğlub olub. “APA-Sport” agentliyinin məlumatına görə, Şakir Qəribovun baş məşqçisi olduğu yığma komanda Xorvatiya ilə səfər oyununda 2:3 hesabı ilə uduzub. Bu, Xorvatiya ilə yığma komandalar səviyyəsində keçirdiyimiz ilk görüş olub. Oyuna zəif başlayan həmyerlilərimiz ilk hissənin ortasında artıq hesabda 0:2 geri düşüb. Əvvəlcə Yosip Tadiç, ardından İvo İlyeviç qapımıza qol vurub. “Standard” klubunun hücumçusu Asif Məmmədov 34-cü dəqiqədə hesab arasındakı fərqi azaldıb. Ancaq meydan sahibləri fasiləyədək fərqi yenidən iki topa çatdırıb. 38-ci dəqiqədə Tomislav Buşiç fərqlənib. “Xəzər-Lənkəran”ın hücumçusu Vüqar Nadirov 67-ci dəqiqədə hesab arasındakı fərqi yenidən minimuma endirsə də, komandamızın bundan artığına gücü çatmayıb. Bu azmış kimi, oyunu idarə edən rumıniyalı baş hakim Sebastyan Koltesku “Neftçi”nin yarımmüdafiəçisi Namiq Yusifova ikinci sarı, ardından qırmızı vərəqə göstərək, onu meydandan qovub. Qrupumuzda keçirilən digər oyunda İtaliya Albaniyanı 1:0 hesabı ilə məğlub edərək liderliyini qoruyub. Üç oyundan sonra hesabında xal olmayan olimpiya yığmamız qrupda sonuncu yerdədir. Komandamız növbəti matçını oktyabrın 13-də səfərdə Farer adalarına qarşı keçirəcək. /APA-Sport/