Döyüş növləri

Ana səhifə

Döyüş növləri

İqor Ponomaryov Vlastimil Petrjelanın “Neftçi” klubunda uğur qazanacağına inanmır

12 sentyabr 2007 13:42 (UTC +04:00)

“Neftçi” klubunun yeni baş məşqçisinin Vlastimil Petrjela olması mənim üçün gözlənilməz olmadı. Məşqçi bu gün bir yerdə, sabah tamam fərqli məkanda çalışa bilər. Bu mənada Petrjelanın “Neftçi”yə təyinatını adi qarşıladım”. Bu fikirləri “APA-Sport” agentliyinə açıqlamasında “Neftçi” klubunun sabiq futbolçusu İqor Ponomaryov deyib. Futbol üzrə yeganə azərbaycanlı olimpiya çempionu olan İ.Ponomaryov “Neftçi”nin çexiyalı mütəxəssis Vlastimil Petrjelanın rəhbərliyi altında Avropada da nəticə qazanacağına proqnoz verməkdə çətinlik çəkib: “Zenit” Petrjelanın rəhbərliyi altında uğurlu çıxış edibsə, burada komandaya yaradılan şəraitin, futbolçuların da rolu olub. Petrjela “Zenit”də yaxşı şəraitdə işləyib, onun ixtiyarında yüksək səviyyəli futbolçular olub. “Zenit” ilə “Neftçi” tamam fərqli komandalardır. Bildiyimə görə, Petrjela “Zenit”də fəaliyyətini başa vurub vətəninə qayıtdıqdan sonra uğur qazana bilməyib. Bu, çexiyalı mütəxəssisin işlədiyi şərait, sərəncamında olan futbolçulardan çox şey asılı olduğunu göstərir. Bu mənada, Petrjelanın “Neftçi”dəki fəaliyyəti ilə bağlı indidən qəti bir şey söyləmək çətindir”. Rusiyanın “Maşuk-KMV” klubundan ayrıldıqdan sonra dörd aydır işsiz qalan Azərbaycan milli komandasının sabiq baş məşqçisi hələ də istirahət etdiyini qeyd edib: “İsveçdə istirahət edirəm. Məşqçilik fəaliyyətimi davam etdirməklə bağlı yeni variantlar yoxdur. Baş məşqçilərini dəyişən “Neftçi” ilə “Bakı” mənimlə danışıq aparmayıb. Ümumiyyətlə, Azərbaycan klublarından heç biri ilə danışıqlarım olmayıb. İlin sonunadək Bakıya gəlməyi planlaşdırsam da, vaxtını hələ dəqiqləşdirməmişəm”. /APA-Sport/