Döyüş növləri

Ana səhifə

Döyüş növləri

Azərbaycan yığması yubiley ilində qələbə qazana bilmədi

13 sentyabr 2007 08:25 (UTC +04:00)

Azərbaycanla Gürcüstanın milli komandaları arasında keçirilən altıncı yoldaşlıq görüşü heç-heçə başa çatıb. “APA-Sport” agentliyinin məlumatına görə, Tofiq Bəhramov adına Respublika stadionunda baş tutan qarşılaşma 1:1 hesabı ilə nəticələnib. Hesabı 45-ci dəqiqədə Branimir Subaşiç açıb. Bu, serbiyalı futbolçunun Azərbaycan milli komandasının heyətində vurduğu 4-cü qol olub. Qonaqlar ikinci hissə başlayan kimi hesabı bərabərləşdirib. Gürcüstanın “Ameri” klubunun hücumçusu Dmitri Tatanaşvili 47-ci dəqiqədə tarazlığı bərpa edib.
Gürcüstanla indiyədək yalnız yoldaşlıq görüşləri çərçivəsində qarşılaşan Azərbaycan millisi bu matçlardan dördünü öz meydanında keçirib. İki qələbə (hər ikisi 1:0) qazanan yığmamız digər ikisi görüşü heç-heçə başa vurub - 0:0 və 1:1. Gürcüstan öz meydanında Azərbaycanla iki dəfə qarşılaşıb və hər ikisində qələbə qazanıb - 6:3 və 1:0. Dörd gün sonra 15 illik yubileyini qeyd edəcək Azərbaycanın millisinin debüt oyunu məhz Gürcüstana qarşı olub. 1992-ci ilin sentyabrın 17-də Gürcüstanın Gürcaani şəhərində keçirilən və 3:6 hesabı ilə məğlub olduğumuz həmin qarşılaşmada yığmamızın hazırkı baş məşqçisi Şahin Diniyev də iştirak edib. Onun köməkçisi Nazim Süleymanov isə Azərbaycanın ilk qolunu vurub.
Növbəti oyununu da Respublika stadionunda keçirəcək milli komandamız 2008-ci il Avropa çempionatının seçmə qrup mərhələsi çərçivəsində oktyabrın 13-də Portuqaliya yığmasını qəbul edəcək. /APA-Sport/