Döyüş növləri

Ana səhifə

Döyüş növləri

Viktor Barışev: “MKT-Araz” UEFA kubokunda mübarizəni dayandırmasaydı, ən azı yarım il yaşayardı”

19 sentyabr 2007 16:53 (UTC +04:00)

- “MKT-Araz”dan niyə ayrıldınız?
- Cari Azərbaycan çempionatının startına təqribən iki gün qalmış sponsorumuz komandamızdan imtina etdi. Əlbəttə, hamı şokda idi. Mən təcili qaydada özümə yeni klub axtarışına çıxdım. Hələlik Moldova çempionatında “İskra-Stal” klubunda çıxış etmək qərarına gəlmişəm.
- Hansı müddətədək?
- Hələlik qışadək. Davamına baxarıq.
- Bildiyimizə görə, Azərbaycan klublarından biri sizə təklif göndərmişdi. Nəyə görə qalmadınız?
- Düzü, həmin klubun təklif etdiyi maliyyə şərtləri məni qane etmədi.
- Belə demək olarmı ki, pauza götürmüsünüz və qışda yenidən Azərbaycana qayıda bilərsiniz?
- Prinsipcə, bəli. Fikrimcə, mən Azərbaycanda futbolçu kimi özüm barədə yaxşı təəssürat yaratmışam. Əgər hər şey normal məcrada getsə, yaxşı təkliflər olsa, qayıdacağam.
- Hər halda, Siz artıq Azərbaycana öyrəşmişdiniz...
- İndi demək olar ki, bəli. Amma əvvəlcədən çətin idi.
- Orada futbolun vəziyyəti necədir?
- Düzü, Azərbaycan komandalarının səviyyəsi Moldovanınkından bir az üstündür. Əvəzində ölkə çempionatında ilk üç yer uğrunda ən azı 7 komanda mübarizə aparır. Azərbaycan çempionatı bu xüsusiyyətinə görə maraqlıdır. Mübarizə hər oyunda son turadək gedir.
- Azərbaycan futbolundakı pulun həcmi Moldovanınkından çoxdur...
- Bəli. Bu mənada fərq böyükdür. Orada klubların çox layiqli maliyyə qaynaqları var.
- UEFA kubokunun ilkin təsnifat mərhələsində “MKT-Araz”ı Polşanın “Qrotslin” klubu mübarizədən kənarlaşdırdı. Bu mərhələni keçə bilsəydiniz, komanda yaşayardı?
- Birmənalı şəkildə, bəli. Çempionata başlasaydıq, mütləq yaxın yarım ildə komandamız da yaşayardı. Təəssüf ki, cavab görüşündə ələdə düşən əlverişli imkanlarımızı qaçırdıq. O cümlədən, mən əlverişli vəziyyətdən topu rəqib qapısına göndərə bilmədim. Nəticədə sona beş dəqiqə qalmış qapımızdan hansısa mənada komandamızın taleyini həll edən top buraxdıq.
- Vadim Borets Azərbaycanda necə yaşayır? Onunla tez-tez əlaqə yaradırsınızmı?
- Vadim “Neftçi”nin liderlərindən biridir. Onda hər şey yaxşıdır. Tez-tez bir-birimizlə əlaqə saxlayırıq.
- Sizcə, Moldovada futbolçulara Azərbaycan kimi ölkələrə getməmələri üçün niyə yaxşı şərait yaratmırlar?
- Bizdə hələ futbola böyük pullar qoymağa hazır deyillər. Mən bu baxımdan, malikanə rolunu oynayan “Şerif” və “Zimbru” barədə danışmıram. Qalan klublarımız hazır deyillər. Bu səbəbdən, futbolçular xaricdə çıxış etməyə klub axtarırlar.
- Amma “İskra-Stal”ın Metallurgiya zavodu kimi çox yaxşı sponsoru var...
- Bəli, sponsor güclüdür. Amma inanmıram ki, onlar Azərbaycanda futbolçulara verilən pulun heç olmasa, yarısını ödəmək iqtidarında olsunlar.
- Moldova yığmasına əvvəllər müntəzəm olaraq, dəvət alırdınız...
- Hər bir məşqçinin özünəməxsus xüsusiyyəti, tələbləri var. Əvvəlki baş məşqçi bir qrup oyunçulara, hazırkı baş məşqçi İqor Dobrovolski isə başqalarına güvənir. Bu, normal haldır. Əlbəttə, yığmada çıxış etmək istərdim. Amma bunun üçün mənim arzum kifayət deyil. Mənə isə yalnız yaxşı çıxış etmək qalır. Məşqçilər qoy özləri qərar versinlər.
- Bəlkə, baş məşqçinin gözündən uzaqda oynadığınız üçün dəvət almırsınız?
- Prinsipcə, bu da təsirini göstərir. Azərbaycan çempionatını az adam izləyir. Əgər Azərbaycan futbolunun flaqmanı “Neftçi”nin ən yaxşı oyunçularından sayılan Vadim Borets yığmada oynamırsa, nə demək olar? Halbuki, mən səviyyəcə “Neftçi”dən geri qalan klubda çıxış edirdim. /APA-Sport/