Döyüş növləri

Ana səhifə

Döyüş növləri

Sergey Sokolov: “Hazırda Şahin Diniyevin və Azərbaycan yığmasının futbolçularının hesabına yaşayıram”

26 sentyabr 2007 12:04 (UTC +04:00)

Qanında istifadəsi qadağan olunan dərman preparatı tapıldığı üçün UEFA tərəfindən 18 aylıq cəzaya məruz qalan Azərbaycan milli komandasının rusiyalı müdafiəçisi Sergey Sokolovun “APA-Sport” agentliyinə eksklüziv müsahibəsi

- Sergey, bildiyimizə görə, cəzalandıqdan sonra Rusiyada həvəskarlar liqasında çıxış edirsən. Hazırda hansı klubda oynayırsan?
- Cəza müddətini həvəskar klubların heyətində keçirirəm. Formamı itirməmək məqsədilə məşqlərdən qalmıram, daim hazırlığıma fikir verirəm. Peşəkar klubda çıxışıma qadağa qoyulduğu üçün həvəskarlar liqasında oynamaqla kifayətlənməli oluram. Hazırda “FC Stavropol” klubunda çıxış edirəm. Bundan əvvəl Armavirin “Torpedo” klubunun heyətində yer almışdım. Ancaq “Torpedo”da çıxışıma sonradan qadağa qoyulduğundan, bu komandanı tərk etməli oldum.
- Məgər “Torpedo” həvəskarlar liqasında çıxış etmir?
- “Torpedo” həvəskar liqasında mübarizə aparır.
- Bəs qadağaya nə səbəb oldu?
- Bilmirəm. Dedilər ki, “Torpedo” həvəskar komanda olsa da, oynaya bilməzsən. Belə fikirləşirəm ki, Rusiyada məni gözü götürməyənlər, oynamağımı istəməyənlər var. Bir ay öncə özümə yeni klub tapmışam ki, bu da “FC Stavropol”dur. Həvəskar komanda olan “FC Stavropol”da oynamağa icazə veriblər. Bu komanda Krasnodar vilayətinin birinciliyində çıxış edir.
- 30 yaşlı Sergey Sokolov peşəkar karyeradan, Azərbaycan milli komandasının heyətində Avropa miqyaslı yarışın iştirakçısı olduqdan sonra həvəskarlar liqasında özünü necə hiss edir?
- Əlbəttə ki, heç də yaxşı deyil. Ancaq həyat davam edir və dayanmamaq, hərəkət etmək, irəliləmək lazımdır. Buna görə də əlinə düşmək imkandan bərk-bərk yapışmaq lazımdır. Hesab edirəm ki, getdikcə işlər qaydasına düşəcək. Diskvalifikasiya vaxtım qurtaracaq və yenidən sıraya dönəcəyəm.
- Cəza müddəti gələn ilin aprelində başa çatır...
- Bəli, 2008-ci ilin aprelin sonunda.
- Həmin vaxt Rusiyada qalacaqsan, yoxsa Azərbaycana qayıdacaqsan?
- Bu haqda dəqiq danışa bilmərəm. Heç bir təklif almamışam.
- Yenidən Azərbaycan klubunda, Azərbaycan yığmasında çıxış etmək istəyərdin?
- İndi bu suala cavab verə bilmərəm. Azərbaycandan təklif gəlsə, məmnuniyyətlə, bu barədə fikirləşəcəyəm.
- Necə hesab edirsən, dopinqlə bağlı qalmaqaldan sonra komandalarımız səni yada salıb, cəzan başa çatandan sonra xidmətində maraqlı olar?
- Bilmirəm. Bu klublara aid olan məsələdir. Onlar bunu həll edir, qərarlarını verirlər. Mənə yada salsalar, xidmətində maraqlı olsalar, buna çox şad olaram.
- Oktyabrda cəzalanmağının bir ili tamam olacaq. Bu müddətdə peşəkar futboldan kənarda qalmısan. İndi vəziyyəti təhlil edəndə nə düşünürsən? Həqiqətən günahkar idin, yoxsa kimlərinsə güdazına getdin?
- Özümə yüz faiz əminəm. Günahkar olmadığımı tam əminliklə söyləyə bilərəm. Əzab çəkirəmsə, bunun kimin acı zarafatı ucbatından baş verdiyini deyə bilmərəm. Allah göydən baxır və gec-tez hər şey öz yerini tutacaq.
- Sergey, peşəkar futboldan kənardan qalmaq, həm də maddi vəziyyətinə təsir göstərir. Bilmək olarmı, necə dolanırsan, ailəni hansı pulla saxlayırsan?
- Burada həvəskarlar liqasında maddi planda heç bir qazancım olmur. Yeganə dəstək Azərbaycan milli komandasında çıxış edən futbolçulardan və baş məşqçi Şahin Diniyevdən gəlir. Şahin müəllim də hər zaman məni yada salır, daim mənə kömək edir. Hal-hazırda mən onların hesabına yaşayıram.
- Bizdə olan məlumata görə, Azərbaycan yığmasının üzvləri Gürcüstanla sentyabrın 12-də Bakıda keçirilən yoldaşlıq görüşündən sonra sənə 1500 dollar göndərib...
- Doğrudur.
- Avqustun 22-də Tacikistanla keçirilən oyundan sonra da belə olub?
- Bəli. Milli komandanın üzvləri Şahin müəllimlə bir araya gələrək, mütəmadi mənə pul göndərirlər. Bu köməyə görə onlara dərin minnətdarlığımı bildirirəm.
- Bu maddi dəstək hər ay, yoxsa yalnız Azərbaycan yığmasının oyunları zamanı olur?
- Ancaq milli komandanın oyunları zamanı.
- Heç Azərbaycan millisinin oyunlarını izləmisənmi?
- Yox. Ancaq qəzet, internet vasitəsilə məlumat alıram.
- Bəs oyunları televizordan izləməyə imkanın olmayıb?
- Yox. Çünki burada AzTV göstərmir. Hər halda, oyunlarla bağlı xəbərlər verirlər. Bilirəm ki, oktyabrın 13-də Bakıda Portuqaliya yığması ilə görüşəcək. Azərbaycan millisinə gələcək oyunlarda uğurlar arzulayıram. /APA-Sport/