Döyüş növləri

Ana səhifə

Döyüş növləri

Anatoli Konkov: “Azərbaycan çempionatında qələbə qazanmaq çətindir”

01 oktyabr 2007 08:39 (UTC +04:00)

“Azərbaycan çempionatında qələbə qazanmaq çətindir. Orada futbolətrafı hadisələr olduqca güclüdür”. “APA-Sport” agentliyinin məlumatına görə, bu sözləri Bakının “İnter” klubunun sabiq baş məşqçisi Anatoli Konkov deyib. Vaxtilə Rusiyanın “Zenit” klubunda da baş məşqçi kimi fəaliyyət göstərmiş ukraynalı mütəxəssis bu postun daha bir sabiq sahibi Vlastimil Petrjela ilə heç vaxt yollarının kəsişmədiyini vurğulayıb: “Petrjelanın iş prinsiplərinə də bələd deyiləm. Ona görə də “Neftçi”nin yeni baş məşqçisinin Bakıdakı problemləri barədə danışmayacağam. Yayda oğlum Sankt-Peterburqdan mənə Petrjelanın kitabını gətirmişdi. Oxuyuram və hər şey mənə aydın olur”. A.Konkovun sözlərinə görə, Azərbaycanda futbol yolun başlanğıcındadır, on illik fasilədən sonra yerli klublarda pullar peyda olub. “İnter”də baş məşqçi vəzifəsi ilə yanaşı, klubun I vitse-prezidenti funksiyalarını da yerinə yetirdiyini xatırladan 58 yaşlı çalışdırıcı milli çempionatda hətta sadə məsələlərə anlaşılmaz reaksiyanın verilməsindən danışıb: “Futbolçuların işini yüngülləşdirməkdən ötrü AFFA qarşısında müxtəlif məsələlər qaldırırdım. Kütləvi sayda misal çəkə bilərəm. 50 dərəcə istidə oyunlar saat 17:00-da başlanır. Bakıda işıqlandırma sistemi olduğu halda, nəyə görə gec oynamayaq? Bax, belə sadə məsələlər anlaşılmaz qarşılanırdı. Reqlamentdə yazılıbsa, demək, oynamaq olar”. /APA-Sport/