Döyüş növləri

Ana səhifə

Döyüş növləri

Ağasəlim Mircavadov: “Valentin Xodukinin futbol düşüncələrinə yaxşı bələdəm”

05 oktyabr 2007 15:08 (UTC +04:00)

“İnter” bizimlə oyuna adətən ciddi hazırlaşır. Komanda bu dəfə də görüşə böyük motivasiya ilə çıxacaq”. Bu sözləri “APA-Sport” agentliyinə açıqlamasında “Xəzər-Lənkəran” klubunun baş məşqçisi Ağasəlim Mircavadov deyib. Cari mövsümdə “İnter” klubunun oyununu görmədiyini vurğulayan A.Mircavadovun sözlərinə görə, məhz bu amil sabahkı qarşılaşmada çətinlik yarada bilər: “Hər halda, Valentin Xodukinin məşqçilik bacarığı mənə tanışdır. Onun futbol düşüncələrinə yaxşı bələdəm. “İnter” güclü rəqib olduğundan, oyun da çətin olacaq”. A.Mircavadov meydan amilinin də matça təsir edəcəyini vurğulayıb: “Şəfa” stadionunda yeniləşən ot örtüyü sintetikdir. Belə qazon oyunun keyfiyyətinə, sürətinə, topun qəbuluna, topla davranmağa öz təsirini göstərəcək. Hər halda, üzləşdiyimiz çətinliklərə baxmayaraq, “İnter”lə görüşə yalnız qələbə qazanmaq üçün çıxacağıq. Qələbə seriyasını davam etdirmək əzmindəyik”.
Qeyd edək ki, cari mövsümdə bütün oyunları qələbə ilə başa varan “Xəzər-Lənkəran” milli çempionatlar tarixində “İnter” klubunu məğlub edə bilməyib. /APA-Sport/