Döyüş növləri

Ana səhifə

Döyüş növləri

Portuqaliya yığması “Şəfa” stadionunda məşqə çıxmaqdan imtina edib

10 oktyabr 2007 12:59 (UTC +04:00)

Azərbaycan milli komandasının Avropa çempionatının seçmə qrup mərhələsindəki növbəti rəqibi Portuqaliya yığmasının Bakıda məşq keçəcəyi stadionlar dəyişdirilib. AFFA-nın Milli Komandalar Departamentinin rəisi Bəhruz Əsgərovun “APA-Sport” agentliyinə verdiyi məlumata görə, stadion dəyişikliyi portuqaliyalıların istəyi ilə həyata keçirilib. B.Əsgərov bildirib ki, Portuqaliya milli komandası paytaxtımızda ilk və son məşqinə “Şəfa”da deyil, Mehdi Hüseynzadə adın Sumqayıt şəhər stadionunda çıxacaq: “Portuqaliyalılar özləri belə istədilər. Dünən Portuqaliya Futbol Federasiyasının 4 nümayəndəsi Bakıya gəlib. Onlara Tofiq Bəhramov adına Respublika stadionu ilə yanaşı, ehtiyat variant kimi “Şəfa”, İsmət Qayıbov adına Bakıxanov qəsəbə və Mehdi Hüseynzadə adına Sumqayıt şəhər stadionunu təklif etmişdik. Hər 3 stadionu gəzdikdən sonra onlar Sumqayıt stadionunu seçdilər“. Qeyd edək ki, öncə AFFA Portuqaliya komandasının iki məşqini “Şəfa”da keçəcəyi barədə məlumat yaymışdı. Luis Felipe Skolari Bakıda öz yetirmələrinə ilk məşqi sabah saat 16:00-da keçəcək. Oktyabrın 12-də eyni saatda Tofiq Bəhramov adına Respublika stadionu portuqaliyalıların ixtiyarına veriləcək. Pireney yarımadası təmsilçiləri Azərbaycanla görüşdən sonra iki gün paytaxtımızda qalaraq, Qazaxıstanla oyuna hazırlaşacaqlar. Portuqaliya yığması oktyabrın 14-də saat 16:00-da da Respublika stadionunda məşq edəcək. Onların son məşqi oktyabrın 15-i saat 09:00-da Sumqayıt stadionuna təyin olunub. /APA-Sport/