Döyüş növləri

Ana səhifə

Döyüş növləri

Valentin Xodukin: “Heç Aslan Kərimovu Ronaldoya qarşı oynatmaq olar?”

18 oktyabr 2007 12:42 (UTC +04:00)

“Portuqaliya və Serbiya kimi güclü komandalara qarşı üç müdafiəçi ilə oynamaq düzgün deyil”. Bu sözləri “APA-Sport” agentliyinə açıqlamasında “İnter” klubunun baş məşqçisi Valentin Xodukin deyib. AFFA-nın Məşqçilər Şurasının üzvü olan ukraynalı mütəxəssis güclü rəqiblərlə oyunlarda seçilən taktikanın, neçə müdafiəçi ilə oynamağın vacibliyini qeyd edib: “Portuqaliya, Serbiya kimi milli komandalara qarşı görüşlərdə müdafiəçilərin sayı çox olmalıdır ki, arxa xətdə sıxlıq yaransın. Bununla bağlı öz tövsiyələrimi bildirmişdim. Misal üçün, televiziyadan izlədiyim Rusiya İngiltərə görüşündə meydan sahibləri üç müdafiəçi ilə çıxış edirdi. Ancaq Azərbaycandan fərqli, Rusiya yığmasında orta sahə oyunçuları müdafiəçilərə böyük kömək göstərdiyindən, boşluqlar yaranmırdı. Serbiya ilə görüşdə Azərbaycanın belə böyük hesabla məğlub olmağında, xətlər arasında boşluğun yaranmasının, yarımmüdafiəçilərin kömək göstərməməyi nəticəsində müdafiəçilərin üzərinə böyük ağırlığın düşməsi öz sözünü dedi”. Azərbaycan yığması Serbiyadan fərqli, Portuqaliya ilə görüşdə üç yox, dörd müdafiəçi ilə çıxış edib. Ancaq nə 3-5-2, nə də 4-4-2 taktiki sxemləri məğlub olmağımıza mane oldu. İki oyuna 8 qol buraxan Azərbaycan millisinin müdafiə xəttinə isə V.Xodukinin “İnter”də rəhbərliyi altında çıxış edən Samir Abbasov başçılıq edib. Ancaq ukraynalı mütəxəssis yetirməsində o qədər də günah görmür: “Samir nə etməli idi? Onun üzərinə böyük yük düşürdü. Meydanda üzərinə düşən vəzifələri yerinə yetirməyən cinah müdafiəçilərinin yerinə də hər cinaha tərəf 30 metr qaçmalı olurdu. Portuqaliya ilə matçda sağ cinah müdafiəçisi mövqeyində çıxış edən “Qarabağ”ın oyunçusu Aslan Kərimovu cinah müdafiəçisi saymıram. Aslan cinah müdafiəçisinin tələblərinə cavab vermədiyi halda, onu meydanda Kriştiano Ronaldoya qarşı qoymaq olar?” /APA-Sport/