Döyüş növləri

Ana səhifə

Döyüş növləri

Yaşar Vahabzadə: “Postumdan getməyə hazıram”

23 oktyabr 2007 11:07 (UTC +04:00)

“Hamı aşağı yaşlılardan ibarət yığmalara əcnəbi baş məşqçi gətirilməsini istəyir. Amma mən bunu mövcud vəziyyətdən çıxış yolu saymıram”. Bu sözləri “APA-Sport” agentliyinə açıqlamasında Azərbaycanın 17 yaşınadək futbolçulardan ibarət milli komandasının (U-17) baş məşqçisi Yaşar Vahabzadə deyib. Onun bildirdiyinə görə, ölkə futbolunu inkişaf etdirmək üçün digər üsullara əl atmaq lazımdır: “Fikrimcə, idman, eləcə də futbol məktəblərində iş yüksək səviyyədə aparılmalıdır. Mən U-17-yə oyunçuları klublardan, idman və futbol məktəblərindən götürürəm. Təsəvvür edirsiniz, onlara futbolun əlifbasını öyrədirəm. Milli komandanın düşərgəsinə gələn yeniyetmə futbolçuların əksəriyyəti elementar biliklərə malik deyillər”. Y.Vahabzadə vurğulayıb ki, bütün yaş qruplarından ibarət yığmaların əcnəbi mütəxəssislərə həvalə edilməsi effekt verməyəcək. O, qonşu Gürcüstandan ibrət götürməyi lazım bilib: “Gürcüstanın həm əsas, həm də 17 yaşlılardan ibarət milli komandasına almaniyalı rəhbərlik edir. Ancaq Gürcüstanın U-17-i son iki ildə Avropa çempionatının ilkin mərhələsini adlaya bilməyib. Onlar ötən il bu vəzifənin öhdəsindən heç öz meydançasında belə gəlməyi bacarmadılar”. Y.Vahabzadə əcnəbi məşqçiyə görə hazırda tutduğu vəzifədən getməyə hazır olduğunu söyləyib: “Əgər mənim əvəzimə xarici çalışdırıcı gətirsələr, ona uğurlar arzulayıram. Vəzifəmdən gedərəm ki, qoy, bir az da o əziyyət çəksin”. Baş məşqçisi qeyd edib ki, AFFA ilə müqaviləsini uzadıb-uzatmayacağı məlum deyil: “Bu yaxınlarda AFFA rəhbərliyi ilə bu məsələni müzakirə edəcəyik. Vəzifəmdə qalıb-qalmayacağım danışıqlardan asılıdır”.
Qeyd edək ki, Y.Vahabzadə 2005-ci ilin dekabrından indiyədək U-17-də baş məşqçi postunu tutur. Onun rəhbərliyi altında milli komandamız 2006-cı ildə Avropa çempionatının ikinci seçmə mərhələsinə adlayıblar. Y.Vahabzadənin AFFA ilə müqaviləsi bu ili oktyabrın 31-də başa çatacaq. /APA-Sport/