Döyüş növləri

Ana səhifə

Döyüş növləri

Valentin Xodukin: “Mahmud bilərəkdən sarı vərəqə alıb”

23 oktyabr 2007 16:29 (UTC +04:00)

“İnter” klubu Lənkərana Mahmud Qurbanovsuz yollanıb. “APA-Sport” agentliyinin məlumatına görə, veteran futbolçu cəzalı olduğu üçün Azərbaycan kuboku uğrunda “Masallı” klubu ilə sabah keçirilən səfər matçında iştirak etməyəcək. Paytaxt klubunun ukraynalı baş məşqçisi Valentin Xodukin “APA-Sport” agentliyinə açıqlamasında M.Qurbanovu qəsdən Lənkərana aparmadığını söyləyib: “Mən özüm istəmədim ki, Mahmud Lənkərana getsin. Onsuz da cəzalıdır və “Masallı” ilə sabahkı matçda bizə kömək etməyəcək. Belə olan halda, Mahmudu özümüzlə aparmağın nə mənası var? Üstəlik, Lənkərana qayıtmaq onun psixoloji durumuna mənfi təsir göstərəcək”. “Xəzər-Lənkəran”ın sabiq futbolçusu olan M.Qurbanov “Masallı” ilə Bakıda keçirilən çempionat oyununda azarkeşlərin təzyiqi ilə üzləşib. 34 yaşlı yarımmüdafiəçi “Simurq”la görüşdə cari mövsümdə dördüncü sarı vərəqəsini almaqla, cəzalı duruma düşüb. V.Xodukinin sözlərinə görə, M.Qurbanov dördüncü sarı vərəqəsini bilərəkdən alıb: “Mahmud bilərəkdən sarı vərəqə alaraq, cəzalı duruma düşdü. Çünki o qarşıdakı çempionat oyunlarında bizə daha çox lazımdır. Mahmud kubok matçını buraxdıqdan sonra belə problemi olmayacaq”.
Qeyd edək ki, “İnter” növbəti turda oktyabrın 29-da “Qarabağ”ın qonağı olacaq. /APA-Sport/