Döyüş növləri

Ana səhifə

Döyüş növləri

Azərbaycanlı 3 ağır atlet Universiadada medal qazana bilməyib

11 iyul 2013 08:55 (UTC +04:00)

Rusiyanın Kazan şəhərində keçirilən XXVII Yay Universiadası davam edir. Apasport.az saytının məlumatına görə, daha 3 ağırlıq qaldıranımız körpücük üzərinə çıxıb.

Kişilər arasında 77 kq çəki dərəcəsində Nicat Rəhimov və Elxan Əliquluzadə, qadınlarda isə 69 kq çəki dərəcəsində Alyona Kiriyenko mübarizə aparıb. İlk olaraq kişilər medal qazanmağa çalışıb.

Birdən qaldırma hərəkətinə Elxan daha əvvəl start verib. O, əvvəlcə, 135 kq-lıq ştanqı başı üzərinə qaldırıb. Ancaq sonra sifariş verdiyi 140 kq-ı iki yanaşmada ram edə bilməyən Əliquluzadə, bu hərəkətdə 14-cü yeri tutub.

Nicat isə daha uğurlu çıxış edib. O, ilk olaraq 147 kq-ı sifariş verib və öhdəsindən gəlib. Növbəti çəki 152 kq olub. Rəhimov bu ştanqın öhdəsindən yalnız iki yanaşmada gələ bilib. Nəticədə Nicat bu hərəkətdə 5-ci yerə sahib olub.

Qadın atletimiz isə birdən qaldırma hərəkətinə 90 kq-la başlayıb. Bu çəkini ustalıqla ram edən Alyona, növbəti yanaşmada 94 kq-ın da öhdəsindən gəlib. Ancaq üçüncü cəhdə 96 kq-a güc gələ bilməyən Kiriyenko, bu hərəkətdə 6-cı yeri tutub.

Təkanla qaldırma hərəkəti idmançılarımız üçün uğursuz alınmayıb. Əliquluzadə əvvəlcə 170, sonra isə 179 kq-ı ram edib. Ancaq o, sonuncu yanaşmasında sifariş verdiyi 185 kq-ı qaldıra bilməyib. Nəticədə Elxan bu hərəkətdə 11-ci olub.

Toplamda isə 314 kq (135 kq + 179 kq) nəticə göstərən Əliquluzadə, yekun sıralamada 12-ci pillədə qərarlaşıb.

Rəhimovun çıxışı isə daha uğursuz alınıb. İdmançımız gözlənilmədən hər üç yanaşmasında ştanqı qaldıra bilməyib. İki yanaşmada 185 kq-a güc gələ bilməyən Rəhimov, üçüncüdə 190 kq sifariş verib. Lakin onu da qaldıra bilməyən Rəhimov həm təkanla qaldırmanı, həm də ümumilikdə yarışı nəticəsiz başa vurub.

Kiriyenko isə təkanla qaldırma hərəkətində əvvəlcə 115 kq-ı ram edib. Daha sonra isə 120 kq sifariş versə də, onu nə ikinci, nə də üçüncü yanaşmada ram edə bilib. Nəticədə Alyona bu hərəkətdə 5-ci olub.

Toplamda 209 kq (94 kq + 115 kq) nəticə göstərən atletimiz yekun sıralamada da 5-ci yeri tutub.

Qeyd edək ki, XXVII Yay Universiadasında cüdoçumuz Məmmədəli Mehdiyev (81) bürünc və kəmər güləşçimiz Ülviyyə Kərimova (52) ilə Kristina Yovu (58) gümüş, atletimiz Firudin Quliyev isə qızıl medal qazanıb.