Elm və təhsil

Ana səhifə

Elm və təhsil

Dövlət qurumları üçün strateji və böhran kommunikasiyası təlimləri başlayıb - FOTO

24 aprel 2025 09:42 (UTC +04:00)

Bir sıra dövlət orqan və qurumlarının kommunikasiyaya məsul şəxsləri üçün “Strateji kommunikasiya və böhran kommunikasiyasında yeni trendlər” mövzusunda təlimlərə başlanılıb.

APA xəbər verir ki, medianın İnkişafı Agentliyi və ADA Universitetinin birgə təşkilatçılığı ilə bir sıra dövlət orqan və qurumlarının kommunikasiyaya məsul şəxsləri üçün “Strateji kommunikasiya və böhran kommunikasiyasında yeni trendlər” mövzusunda təlimlərə başlanılıb.

Təlimin açılış mərasimində çıxış edən Medianın İnkişafı Agentliyinin aparat rəhbəri Rəqsanə Kərimova qeyd edib ki, müasir dövrdə informasiya məkanındakı sürətli dəyişikliklər və rəqəmsal transformasiyalar strateji kommunikasiyanın rolunu daha da artırmaqla dövlət qurumları və cəmiyyət arasında effektiv əlaqənin qurulmasını, məlumatların düzgün və operativ şəkildə təqdim edilməsini, qarşılıqlı etimad mühitinin gücləndirilməsini zəruri edir. O, media subyektləri ilə əlaqələrin təkmilləşdirilməsinin, xüsusilə də böhran vəziyyətlərində ardıcıl və koordinasiyalı mesajların verilməsinin vacibliyinə toxunaraq bildirib ki, bu kimi təlimlər mətbuat xidmətlərinin peşəkarlığının artırılmasına və daha çevik kommunikasiya strategiyalarının hazırlanmasına mühüm töhfə verir.

ADA Universitetinin Tədris işləri üzrə prorektorunun müşaviri Aygün Hacıyeva çıxışında bildirib ki, təlim proqramı iştirakçılara strateji kommunikasiyanı dövlət qurumlarında praktik fəaliyyət sahəsi kimi dərk etməyə, onun funksiyaları, strategiyaları və texnikaları ilə tanış olmağa şərait yaradır. O diqqətə çatdırıb ki, müxtəlif kontekstlərdə strateji və böhran kommunikasiyasının tətbiqinə dair nümunələrin öyrənilməsi, aktual təcrübələrin təhlili və müzakirəsi iştirakçıların bilik və bacarıqlarının artırılmasına zəmin yaradacaq.

ADA Universitetinin Siyasət araşdırmaları, təhlil və nəşrlər üzrə direktoru, professor Damyan Krnceviç Mişkoviç “Əsaslar, təriflər və reputasiyanın idarə edilməsi: Media seçimləri, PR kampaniyaları, kommunikasiya dövrünün dəstəklənməsi”, “Böhran hallarına hazırlıq və tədbirlər: Uğursuzluq yolu ilə öyrənmə, yenilənmə və bərpa prosesinin müqayisəsi”, “Göz və qulaq üçün yazı: Mesajın dizaynı, dil abstraksiyası və seçim, hisslərin idarə edilməsi” adlı üç sessiyada çıxış edərək, kommunikasiyaya məsul şəxslərlə mövcud və yeni yanaşmalar ətrafında müzakirə aparıb.