Sahibkarlıq

Ana səhifə

Sahibkarlıq

«Müasir Gənclər»in pivə istehsalına qadağa qoyulub

27 iyul 2012 09:56 (UTC +04:00)

Bakı. Əli Əhmədov – APA-Economics. Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti Xaçmaz rayonu, Qaraqurdlu kəndində yerləşən «Müasir Gənclər» MMC-də pasterizə olunmamış açıq rəngli pivənin istehsalına dövlət nəzarəti həyata keçirib.

Komitədən «APA-Economics»ə verilən məlumata görə, araşdırma zamanı müəyyən olunub ki, pivə AZS 143-2005 dövlət standartının tələblərinə uyğun olmayaraq, sanitariya norma və qaydalara riayət edilmədən, texnoloji təlimat və resepturalar olmadan istehsal olunur: «Müəssisədə hazır məhsulun sınaqlarını aparmaq üçün laboratoriya mövcud deyil, istehsal sahələri gigiyenik norma və qaydalara cavab vermir, sabit keyfiyyətdə məhsul istehsalı üçün şərait yoxdur, istismar olunan ölçmə vasitələri müqayisəli dövlət yoxlanışından keçmədən istifadə olunur».

Bundan başqa müəyyən edilib ki, istifadə olunan avadanlıqların istismar müddəti bitib və istehsal üçün yararsız halda istifadə olunaraq məhsulun texnoloji prosesdə duz məhlulu ilə qarışması ilə nəticələnib, hazırlanan pivə vaxtından tez, yəni yetişmədən istehsaldan çıxarılıb. «Bununla da tonlarla pivə insan həyatı və sağlamlığı üçün təhlükəli halda istehsal olunmuşdur», - deyə məlumatda bildirilir. Dövlət nəzarəti tədbiri zamanı müəssisədə heç bir sınağı aparılmayan, ekstraktivliyi və tündlük faizi təyin olunmayan 2 ədəd 20 tonluq çəndə məhsul aşkar edilib. Aşkar olunmuş qanun pozuntuları ilə bağlı «Müasir Gənclər» MMC-də pivə istehsalı və satışı qadağan edilib.