APA-nın məlumatına görə, hakim Əfqan Hacıyevin sədrliyi ilə başlayan iclasda iş üzrə vaxtilə təqsirli bilinmiş şəxslərdən yalnız Sərdar Cəlaloğlu iştirak edib.
Məhkəmədə çıxış edən Pənah Hüseynin vəkili Mirismayıl Hadi bildirib ki, P. Hüseyn həyat yoldaşının xəstə olması ilə əlaqədar hazırda Azərbaycanda deyil və bununla bağlı məhkəməyə ərizə göndərib.
Hakim isə deyib ki, iş üzrə təqsirləndirilmiş şəxslərin hamısı məhkəmədə iştirak etmədiyi üçün proses bu şəkildə davam etdirilə bilməz.
Proses martın 28-dək təxirə salınıb.
Xatırladaq ki, 2003-cü il oktyabrın 16-da Bakıda keçirilən aksiyada polislə mitinq iştirakçıları arasında baş verən qarşıdurma ilə əlaqədar həbs edilənlər sonradan Avropa Məhkəməsinə müraciət ediblər.
Müsavat Partiyası Mərkəzi İcra Aparatının rəhbəri Arif Hacılı, ADP sədri Sərdar Cəlaloğlu, AXP sədri Pənah Hüseyn, “Yeni Müsavat” qəzetinin baş redaktoru Rauf Arifoğlu, Ümid Partiyasının sədri İqbal Ağazadə və digərləri 2005-ci ilin martında əfv olunublar. Onlar Avropa Məhkəməsinə Azərbaycan hökumətinin Avropa Konvensiyasının 6-cı (ədalətli məhkəmə hüququ) və 11-ci (sərbəst toplaşmaq azadlığı) müddəalarını pozmasından şikayət ediblər. Avropa Məhkəməsi onların xeyrinə qərar çıxarıb.
24 yanvar 2014-cü il tarixində Ali Məhkəmənin plenumunda həmin şəxslərin barəsində Avropa İnsan Haqları Məhkəməsinin qəbul etdiyi qərara baxılıb. Ali Məhkəmə “16 oktyabr” məhkumlarının barəsindəki bütün məhkəmə qərarlarını ləğv edib və işə yenidən baxılması üçün cinayət işinin materiallarını yenidən Bakı Ağır Cinayətlər Məhkəməsinə qaytarıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
