Bakı. Gülnar Bəşirova - APA. «Bu gün imtahanda iştirak edən namizədlərin təxminən 30%-i uğur qazanaraq ədliyyə orqanlarına qulluğa qəbul olunacaq». APA-nın məlumatına görə, bunu jurnalistlərə açıqlamasında Ədliyyə Nazirliyi Müsabiqə Komissiyasının sədr müavini Rauf Məhərrəmov deyib.
O bildirib ki, 2006-cı ildən ədliyyə orqanlarına qulluğa qəbul Tələbə Qəbulu üzrə Dövlət Komissiyası ilə birgə keçirilir və bu, artıq birlikdə keçirilən 10-cu imtahandır: «Bugünkü imtahanda 350-yə yaxın namizəd iştirak edir. Namizədlərin çoxu əsasən gənclərdir və onların böyük əksəriyyəti iş fəaliyyətinə ədliyyə orqanlarında başlamaq istəyir. İmtahanı kifayət qədər yerli və beynəlxalq müşahidəçilər izləyir, 200-ə yaxın vakant yer var».
R.Məhərrəmov onu da əlavə edib ki, test imtahanlarından sonra söhbət mərhələsində adətən namizədlərin 20-30%-i iştirak edir: «Bu gün imtahanda iştirak edənlərin 50%-i əvvəl sənəd verən namizədlərdir».
Qeyd edək ki, bu gün ədliyyə orqanlarına qulluqla bağlı növbəti test imtahanı keçirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
