Bakı. Pərviz Nuriyev – APA-Economics. İsveçrəyə səfəri çərçivəsində iqtisadiyyat və sənaye naziri Şahin Mustafayev İsveçrə Konfederasiyasının Federal müşaviri, İqtisadi Məsələlər, Təhsil və Tədqiqatlar üzrə Federal Departamentin rəhbəri-nazir Yohan Şnayder-Amman ilə görüşüb.
“APA-Economics”in xəbərinə görə, görüşdə Azərbaycan və İsveçrə arasındakı iqtisadi əlaqələr və əməkdaşlığın genişləndirilməsi perspektivləri müzakirə edilib.
Azərbaycan-İsveçrə əməkdaşlığının inkişaf etdiyini qeyd edən Ş. Mustafayev ölkələrimiz arasında siyasi-iqtisadi əlaqələrin inkişafında dövlət başçılarının qarşılıqlı səfərlərinin və aparılan danışıqların mühüm rolunu vurğulayıb.
O Azərbaycan və İsveçrə arasında əməkdaşlığın genişləndirilməsi üçün aidiyyəti dövlət qurumları arasında müntəzəm görüşlərin keçirilməsi, iş adamları arasında biznes forumların və işgüzar görüşlərin təşkilinin əhəmiyyətini diqqətə çatdırıb.
Y. Şnayder-Amman ölkəsinin Azərbaycanla əlaqələrinin inkişafından məmnunluğunu ifadə edərək, ölkələrimiz arasında əməkdaşlığın daha da genişlənəcəyinə əminliyini bildirib.