Daxili siyasət

Bakı. Ramiz Mikayıloğlu - APA. Milli Şuranın sessiyasında qurumun sədri Rüstəm İbrahimbəyovun istefa ərizəsinin müzakirəsi davam edir.

APA-nın verdiyi məlumata görə, politoloq Zəfər Quliyev Rüstəm İbrahimbəyova qurumun fəxri sədri statusu verilməsini dəstəkləyib.

Mehriban Vəzir Milli Şurada partiyalar arasında gizli burulğanlar baş verdiyini müşahidə etdiyini, bunun heç kimə lazım olmadığını söyləyib: “Rüstəm İbrahimbəyov sədrlikdən getmək üçün müraciət edib, zorla onu sədrlikdə saxlamaq istəyirik. Yaxud fəxri sədr yox, fəxri üzv ola bilər. Rüstəm İbrahimbəyov Milli Şurada partiyaları, ictimai təşkilatları bir araya gətirdi, ancaq hansı ziyalıları Milli Şuraya gətirdi? Məlum olan insanlar buradadır. Gəlin, heç kimi bütləşdirməyək. Biz tək sədrliyi qəbul etməliyik. Sədr Cəmil Həsənli olmalıdır. Biz real qüvvələri qiymətləndirməliyik, AXCP və Müsavat partiyalarının rolunu qeyd etməliyik”.

Beynəlxalq təşkilatlarla görüşdən yenicə gəldiyini söyləyən Gültəkin Hacıbəyli həllini tapmış məsələyə yenidən qayıtmağın düzgün olmadığını bildirib: “Rüstəm İbrahimbəyov sədrlikdən istefa barədə müraciət etdi. Ondan əvvəl də böyüklük edərək Cəmil Həsənlinin prezidentliyə namizədliyini dəstəkləmişdi. Ancaq bir məsələdə Mehriban Vəzirlə razı deyiləm. Məsələn, Cəmil Həsənlinin Milli Şuraya gəlişində Rüstəm İbrahimbəyovun rolu böyük olub. Cəmil Həsənli də burada olmasaydı, mən Milli Şuraya gəlməzdim. Mən də hesab edirəm ki, Rüstəm İbrahimbəyova fəxri sədrlik statusu verilməsini səsə qoyaq”.

Fuad Ağayev isə Rüstəm İbrahimbəyovun sədrliyinə qarşı çıxanların hakimiyyətlə eyni mövqedən çıxış etdiyini söyləyib.

Ə. Kərimli isə R. İbrahimbəyovla dünən danışdığını açıqlayıb: “Mən dünən Rüstəm İbrahimbəyovla danışdım. Rüstəm İbrahimbəyov Milli Şurada həmsədrlik institutunun yaradılmasına qarşı çıxdı. O zaman dedim ki, sizin Milli Şuranın fəxri sədri olmasını təklif edirik. Rüstəm İbrahimbəyov buna etiraz etmədiyini söylədi”.

Daha sonra R. İbrahimbəyovun Milli Şuranın sədri postundan istefası ilə bağlı müraciət səsverməyə çıxarılıb və qəbul edilib. Sessiyada iştirak edən 64 Milli Şura üzvündən 10 nəfər bunun əleyhinə çıxıb, 5 nəfər bitərəf qalıb, 49 nəfər lehinə səs verib. Növbəti səsvermədə Cəmil Həsənli qurumun sədri seçilib.

Müsavat başqanı İsa Qəmbər Rüstəm İbrahimbəyovun fəxri sədri olmasına münasibət bildirib: “Belə çıxır ki, Milli Şurada hörmət ediləsi yeganə şəxs Rüstəm İbrahimbəyovdur? Burada 5-10 nəfər deyə bilər ki, Rüstəm İbrahimbəyovun əsərlərini məndən çox oxuyub. Onu yaradıcı insan kimi sevirəm. Bundan sonra da siyasi münasibətlərimizin necə olmasından asılı olmayaraq, sevgimiz davam edəcək. Rüstəm İbrahimbəyov, başqa bir ölkənin vətəndaşı Milli Şuranın fəxri sədri olarsa, Müsavat Partiyası və tərəfdarları bu qurumda təmsil oluna bilməz”.

Sonra Rüstəm İbrahimbəyova qurumun fəxri sədri statusu verilməsi məsələsi səsverməyə çıxarılıb.

Cəmil Həsənli deyib ki, təklif müəllifi olan AXCP sədri Əli Kərimli təklifini geri götürmədiyi üçün məsələ səsverməyə çıxarılmalıdır.

Cəmil Həsənli fəxri sədr məsələsinin Müsavat Partiyası ilə hər hansı qarşıdurmaya səbəb olmasını istəmədiyini bildirib: “Ancaq mən iclası aparan şəxs kimi bu məsələni səsverməyə çıxarmalıyam”.

Daha sonra səsvermə keçirilib və Rüstəm İbrahimbəyov qurumun fəxri sədri seçilib.

Səsvermə qalmaqalla müşahidə olunub və iki dəfə təkrarlanıb. 36 nəfər Rüstəm İbrahimbəyovun sədr seçilməsini dəstəkləyib, 2 nəfər əleyhinə çıxıb, 1 nəfər bitərəf qalıb, 25 nəfər səsvermədə iştirak etməyib.

***

saat 18.49

Bakı. Ramiz Mikayıloğlu - APA. Milli Şuranın sessiyasında qurumun sədri Rüstəm İbrahimbəyovun sədr postundan istefa ərizəsi müzakirəyə çıxarılıb.

APA-nın verdiyi məlumata görə, AXCP sədri Əli Kərimli çıxışında deyib ki,

Cəmil Həsənli Milli Şuranın sədri postuna ən layiqli namizəddir.

O, Rüstəm İbrahimbəyovun isə heç bir siyasi səlahiyyəti olmayan fəxri sədri olmasını təklif edib: “Rüstəm İbrahimbəyovla isə elə rəftar etməliyik ki, sonra iki ziyalı bir-biri ilə söhbətdə deməsin ki, Rüstəm İbrahimbəyov müxalifətə dəstək versə də, ona hörmət qoymadılar”.

“El” Hərəkatı Ali Məclisinin sədri Eldəniz Quliyev R. İbrahimbəyovun Milli Şuranın sədrliyindən istefası məsələsində təzyiqlə üzləşdiyini dilə gətirib. O, R. İbrahimbəyova Milli Şuranın fəxri sədri statusu verilməsi təklifini dəstəkləyib.

KXCP Ali Məclisinin sədri Bəybala Əbil və ACP sədri Sülhəddin Əkbər isə Milli Şurada həmsədrlik institutunun yaradılmasını dəstəkləyiblər. S. Əkbər Milli Şuranın seçki blokuna çevrilməsi, yaxud başqa formada fəaliyyəti ilə bağlı Hərəkət Planı hazırlanması və təşkilati forma qismində Xalq Təmsilçilər Məclisi kimi fəaliyyət göstərməsini istəyib. O, Milli Şuranın Əsasnaməsində Avropaya inteqrasiya məsələsinin də əksini tapmasını zəruri sayıb.

Cəmil Həsənli isə məsələləri mürəkkəbləşdirməməyə çağırıb: “Rüstəm İbrahimbəyov son məktubunda yazmayıb ki, müxtəlif məsələləri müzakirə edək. Konkret istəyini yazıb. Gəlin həm struktur, həm də fəaliyyət istiqamətlərini müzakirə edək, qabağa gedək. Kimin sədr olmasından daha çox, necə işləmək vacibdir. Rüstəm İbrahimbəyov bundan sonra da Milli Şuranın fəaliyyətinə dəstək verəcək”.

AXCP sədrinin müavini Fuad Qəhrəmanlı R. İbrahimbəyova təşəkkür məktubu qəbul edilməsini təklif edib, gələcəkdə başqa ziyalıların, o cümlədən Cəmil Həsənlinin Milli Şuradan küsdürülməsi təhlükəsinin olduğunu dilə gətirib. O, Milli Şurada təmsilçilik prinsipi əsasında məşvərət orqanı yaradılmasını, komissiyaların formalaşdırılmasını, Milli Şuranın regional strukturlarının yaradılmasını istəyib.

Vahid Azərbaycan Milli Birlik Partiyasının sədri Hacıbaba Əzimov isə Milli Şurada həmsədrlik institutunun yaradılması barədə təkidlərin biabırçılıq olduğunu söyləyib: “Ayıbdır, adam həmsədr olmaq istəmir, yenə bu məsələni qaldırırlar”.

H. Əzimov bir qədər danışdıqdan sonra AXCP üzvləri onun reqlamentdən artıq çıxış etdiyini bildirərək, çıxışının dayandırılmasını təklif ediblər. Ancaq Müsavat başqanı İsa Qəmbər və Müsavat Partiyasının İcra Aparatının rəhbəri Arif Hacılı buna qarşı çıxıb. İ. Qəmbər “Niyə Hacıbaba Əzimova çatanda reqlament yada düşür, danışsın”, - deyə bildirib.

H. Əzimov çıxışını davam etdirib və R. İbrahimbəyova hörmət əlaməti olaraq ona fəxri sədr statusunun verilməsinin mümkün olduğunu qeyd edib.

Sonra çıxış edən A. Hacılı isə bildirib ki, real, ölkədə demokratik islahatlar aparmaq istəyən qüvvələrin birliyi olmalıdır: “Burada kimisə qiymətləndirmək üçün başqalarının fəaliyyətini sıfırlamaq olmaz. Burada elə adamlar var, mən onları seçki dövründə görməmişəm. Elə adamlar var ki, mitinqdə çıxış etmələrini təklif etmişəm, getməyiblər. Guya partiyaların indiyə qədər bir araya gəlmədiyi barədə fikirlər işlətmək düzgün deyil. Mən Milli Şura yarananda dedim ki, Seçki Qərargahı, mətbuat xidməti yaradın. Eldar Namazov dedi ki, bunların hamısı İcra Aparatının nəzdində olacaq. Ancaq İcra Aparatının fəaliyyəti hiss olunmadı”.

A. Hacılı R. İbrahimbəyova qarşı kampaniya apardığı barədə fikirlərlə razılaşmayıb: “Yaxın keçmişdə Müsavat Partiyasının qərargahında keçirilən toplantıda 4-5 partiya dedi ki, gedirik. Müsavat Partiyası və ACP-nin birgə səyi nəticəsində biz Milli Şuranı xilas etdik. Bir vaxtlar ehtiyat namizəd məsələsini ələ salırdılar. Biz indi növbəti mərhələyə gəlmişik, birliyimizi davam etdirmək istəyiriksə, bünövrəni düzgün qoymalıydıq. Rəsul Quliyev Milli Şuranın namizədinin əleyhinə təbliğat aparırdı, aparır. Lalə Şövkət və partiyasının da mövqeyi ortadadır. Biz ilkin mərhələdə Rüstəm İbrahimbəyovun Milli Şura ilə bağlı ideyasını qəbul etdik, sonra da Müsavat və AXCP-nin təkidi ilə Cəmil Həsənli prezidentliyə namizəd oldu. Rüstəm İbrahimbəyov prezidentliyə namizədliyi irəli sürüləndə sənədlər 9 gündən sonra Mərkəzi Seçki Komissiyaya təqdim olundu, Cəmil Həsənlinin namizədliyi irəli sürüləndə 20 saata sənədləri MSK-ya təqdim etdik. İndi sizə nə lazımdı? Real qüvvələrin birliyi, yoxsa amorf birlik?”

A. Hacılının çıxışından sonra Müsavat Partiyasının üzvü Tural Abbaslı ilə KXCP üzvləri arasında qalmaqal yaranıb. Tərəflərin əlbəyaxa olmasının qarşısını Milli Şuranın digər üzvləri alıblar.

Sessiya davam edir.