Bakı. Cavid Zeynalov – APA. Daşkənddəki Nizami Gəncəvi adına Daşkənd Dövlət Pedaqoji Universitetində Özbəkistan-Azərbaycan Dostluq Cəmiyyətinin təşkilatçılığı ilə Özbəkistanın müstəqilliyinin 22-ci ildönümünə həsr olunan "Azərbaycan və özbək xalqlarının mədəni və mənəvi birliyi" adlı tədbir keçirilib.
Mədəniyyət və Turizm Nazirliyindən APA-ya verilən məlumata görə, tədbirdə Azərbaycanın Özbəkistandakı səfiri Hüseyn Quliyev, səfirliyin və Heydər Əliyev adına Azərbaycan Mədəniyyət Mərkəzinin əməkdaşları, universitetin professor və müəllim heyəti iştirak edib.
Universitetin rektoru, Özbəkistan-Azərbaycan Dostluq Cəmiyyətinin sədri Şavkat Şaripov, səfir Hüseyn Quliyev 1947-ci ildən böyük Azərbaycan şairi Nizami Gəncəvinin adını daşıyan universitetdə tədbirin keçirilməsinin əhəmiyyətindən danışıb.
Tədbirdə özbək tələbələri tərəfindən hazırlanan ədəbi-bədii kompozisiya tədbir iştirakçılarına təqdim edilib. Mərasimdə Azərbaycan və özbək mahnıları ifa olunub.