Bakı. Könül Kamilqızı – APA. Aprelin 30-da Bakıda 2013-cü ilin ən böyük təhsil sərgisi keçiriləcək. Bakı Şəhəri üzrə Təhsil İdarəsinin təşkilatçılığı ilə baş tutacaq “Təhsil, texnologiya və inkişaf” adlı təhsil sərgisi Sərhədçi İdman Olimpiya Mərkəzində təşkil olunacaq.
BŞTİ-nin ictimaiyyətlə əlaqələr sektorunun müdiri Zəminə Əliqızı APA-ya bildirib ki, Heydər Əliyevin anadan olmasının 90 illik yubileyinə həsr olunacaq sərgidə Bakı şəhərinin bütün təhsil müəssisələrinin əldə etdiyi uğurlar nümayiş olunacaq: “Bundan əlavə, sərgidə təhsil idarəsinin tabeçiliyində olan təhsil müəssisələrinin istedadlı uşaqlarının əl işlərinin sərgisi, eyni zamanda ifaçılıq, rəqsdə xüsusi qabiliyyəti olan uşaqların ifaları nəzərdə tutulur. Sərgi 3 hissədən - rəsmi, bədii və sərgiyə baxışdan ibarət olacaq. Bu tədbiri həm də Bakı şəhəri üzrə Təhsil İdarəsinin 7 illik fəaliyyəti dövründəki hesabatı kimi də qiymətləndirmək olar”.
Təhsil sərgisi aprelin 30-da saat 10:00-dan 18:00-dək davam edəcək. Sərgiyə giriş sərbəst və pulsuzdur. Bu cür sərgi artıq BŞTİ tərəfindən təşkil olunan üçüncü tədbirdir. Belə ki, 2010-cu ildə “Təhsil, zaman və biz”, 2011-ci ildə isə “Təhsildə İKT-nin tətbiqi” adlı sərgi keçirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
