İmişli Rayon Polis Şöbəsindən APA-nın Mil-Muğan bürosuna verilən məlumata görə, dörd gəncin ölümü ilə nəticələnən dəhşətli qəza Ağsu-Kürdəmir-Bəhrəmtəpə avtomobil yolunun 78-ci kilometrliyində İmişli rayonu, Ağaməmmədli kəndindən keçən hissəsində baş verib. İmişli rayon istiqamətində hərəkətdə olan toy karvanındakı 16 yaşlı Musayev Vüsal Beydullah oğlunun idarə etdiyi “VAZ-21015” markalı minik avtombili qarşıdan gələn Gürcüstan vətəndaşı Yahyayev Şahinin idarə etdiyi “SHACMAN” markalı yük maşını ilə toqquşub. Qəza nəticəsində İmişli rayonu Əliyetməzli kənd sakinləri 1994-ci il təvəllüdlü Fətullayev Fətulla Əzizağa oğlu, 1996-cı il təvəllüdlü Baxşəliyev Rahib Nizam oğlu, 1998-ci il təvəllüdlü Musayev Vüsal Beydullah oğlu və 1996–cı il təvəllüdlü Məmmədov Elşən Kamran oğlu hadisə yerində dünyasını dəyişib. Ölənlərin meyitləri avtomobildən xüsusi alətlərlə çıxarılıb. Faktla bağlı araşdırma aparılır.
***
Saat 15.42
İmişli. Əlibәy Zeynallı - APA. İmişlidə dəhşətli avtomobil qəzası baş verib.
İmişli Rayon Polis Şöbəsindən APA-nın Mil-Muğan bürosuna verilən məlumata görə, hadisə bu gün saat 13.00 radələrində İmişli rayonunun Məmmədli kəndi ərazisində baş verib.
İlkin məlumatda bildirilir ki, “Shacman” markalı avtomobillə “VAZ-21015” markalı avtomobilin toqquşması nəticəsində 4 nəfər hadisə yerində ölüb.
Hadisənin təfərrüatları və ölənlərin adları dəqiqləşdirilir.