Bakı. Aqşin Rafiqoğlu - APA-Economics. “Bakcell” şirkəti ölkədə təhsil sahəsində ən böyük internet provayder olan “AzEduNet” şirkəti ilə uğurlu əməkdaşlığını davam etdirir.
Şirkətdən “APA-Economics”ə verilən məlumata görə, 2009-cu ildə iki şirkət arasında başlayan əməkdaşlıq bir sıra layihələrin ərsəyə gəlməsinə səbəb olub.
“O zaman Bakıda və regionlarda 40-a yaxın əməkdaşımızı mobil internet və mobil rabitə ilə təmin etmək üçün bizə geniş əhatə dairəsi və sərfəli qiymət təklif edə bilən mobil operator tələb olunurdu. Dəyərləndirdiyimiz şirkətlər arasında bu tələblərə ən yaxşı cavab verəni Bakcell idi. Biz korporativ tərəfdaş kimi “Bakcell”i seçməyimizdən məmnunuq. Çünki bu günə kimi “Bakcell” tərəfindən göstərilən xidmətin səviyyəsi, şəbəkənin keyfiyyəti və qiymət siyasəti korporativ abunəçi kimi bizi tam şəkildə qane edir”, - deyə “AzEduNet” şirkətinin şəbəkə dəstəyi departamentinin qrup rəhbəri Əli Həsənov bildirib.
Korporativ seqmentdə qurulan əməkdaşlıq yalnız mobil operator və müştəri münasibətləri çərçivəsində məhdudlaşmayıb və getdikcə daha böyük tərəfdaşlığa çevrilib. Əli Həsənov bu haqda belə deyir: “2013-cü ildən isə regionların ucqar kəndlərində yerləşən və heç bir telekommunikasiya vasitələri olmayan məktəbləri və “Distant təhsil” layihəsi çərçivəsində xüsusi qayğıya ehtiyacı olan uşaqları Azərbaycan Təhsil Şəbəkəsinə qoşmaq məqsədini qarşıya qoyduq. Bunun üçün isə ölkənin ən ucqar yerlərində mobil rabitəni və müasir telekommunikasiya həllərini təmin edən mobil şəbəkəyə ehtiyacımız var idi. Bu layihənin yüksək texniki tələblərinə isə məhz “Bakcell” cavab verə bildi. Beləliklə, “Bakcell” ilə növbəti uğurlu əməkdaşlığımızın əsasını qoyduq”.
Bu əməkdaşlıq sayəsində respublikanın texniki imkanların məhdud oldugu müxtəlif ucqar ərazilərində 500-dən artıq məktəb “Bakcell”in təqdim etdiyi 3G interneti vasitəsilə təhsil şəbəkəsinə qoşulub.
“AzEduNet şirkəti bizim təhsil sahəsindəki ən böyük tərəfdaşımızdır. Bakcell şirkəti hər bir korporativ müştəriyə fərdi yanaşır və onların istəklərinə uyğun olan ən yaxşı təklif hazırlayır. “AzEduNet”lə əməkdaşlığımız artıq 7 ildir ki, davam edir. Biz birlikdə ölkə ərazisində 500-dən artıq məktəbi internetə çıxışla təmin etmişik. Bu, çox uğurlu bir layihədir və biz gələcəkdə bu məktəblərin sayını artırmaq haqqında düşünürük”, deyə “Bakcell” şirkətinin baş marketinq və satış direktoru Fedja Hadziç bildirib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
