Moskvada yük avtomobilinin sürücülərinə hücum edən azərbaycanlı və erməni saxlanılıb.
APA-nın məlumatına görə, bu barədə “Moskva” agentliyi yerli hüquq-mühafizə orqanlarındakı mənbəyə istinadən xəbər yayıb.
Hadisə bu ilin aprelində baş verib. Yük avtomobilinin sürücüsü, 1974-cü il təvəllüdlü Qazaxıstan vətəndaşı polisə müraciət edərək bildirib ki, “Volkswagen” markalı avtomobildə olan 4 nəfər ona və yanındakı sürücüyə hücum edib. Onlar sürücüləri odlu silahla təhdid edərək 1300 dollar ekvivalentində tenge və rubl götürüblər.
Avqustun 13-də polis əməkdaşları şübhəli bilinən 57 yaşlı azərbaycanlı və 28 yaşlı ermənistanlını saxlayıblar. Onlar həmçinin narkotik maddələrin qanunsuz dövriyyəsində təqsirli bilinirlər.
Hücumda iştirak edən digər şəxslər isə axtarışdadır.