Bakı. Fərid Mirzəyev – APA. Gənclər və idman naziri Azad Rəhimov aprelin 21-də Yunanıstanda keçiriləcək XXXI Yay Olimpiya və XIV Paralimpiya Oyunlarının olimpiya məşəlinin alovlandırılması mərasimində iştirak edəcək.
Gənclər və İdman Nazirliyinin mətbuat xidmətindən APA-ya verilən məlumata görə, bu münasibətlə Yunanıstan Olimpiya Komitəsinin prezidenti Spiros Kapralos A. Rəhimovu Braziliyada keçiriləcək XXXI Yay Olimpiya və XIV Paralimpiya Oyunlarının olimpiya məşəlinin alovlandırılması mərasimində iştirak üçün bu ölkəyə dəvət edib.
Olimpiya Oyunlarında açılış günü stadionda yandırılan alov ənənəyə görə Yunanıstanda yerləşən Olimpiya məbədindən götürülür.
A. Rəhimov eyni zamanda, aprelin 20-də Azərbaycanın Yunanıstandakı səfirliyi tərəfindən təşkil ediləcək Heydər Əliyevə həsr olunmuş kitabın yunan dilində təqdimat mərasiminə qatılacaq.
Səfər çərçivəsində A. Rəhimovun Yunanıstanın mədəniyyət və idman naziri Aristides Baltes ilə görüşü planlaşdırılır. Görüş zamanı iki ölkə arasında idman sahəsində mövcud əlaqələrin, gələcək əməkdaşlıq perspektivlərinin müzakirəsi və Azərbaycanın Gənclər və İdman Nazirliyi ilə Yunanıstan Mədəniyyət və İdman Nazirliyi arasında idman sahəsində əməkdaşlıq haqqında Anlaşma Memorandumunun imzalanması nəzərdə tutulur.
Səfər 22 aprel tarixinədək davam edəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
