Bakı. Real Cəfərli - APA. Yeni Güney Azərbaycan Milli Oyanış Hərəkatının (Yeni GAMOH) sədrinin növbəti dəfə yeri dəyişdirilib.
APA-nın HRANA-ya istinadən verdiyi məlumata görə, doktor Lətif (Araz) Həsəni tələbləri yerinə yetirilməyərək Tehranın Evin zindanından Kərəcin Rəcayişəhr həbsxanasına köçürülüb.
Buna baxmayaraq, azərbaycanlı siyasi məhbus artıq 45 gündür aclığı davam etdirir. O, mayın 18-dən Təbriz şəhərinin mərkəzi həbsxanasında onunla birgə saxlanılan, 37 gün aclıq aksiyası keçirmiş digər azərbaycanlı fəal Ayət (Yürüş) Mehrəlibəyliyə dəstək vermək, eləcə də siyasi məhbusların hüquqlarının kobud şəkildə pozulmasına etirazını bildirmək üçün aclıq aksiyasına başlayıb. Onun digər tələbi də Təbriz zindanında saxlanılan məhbusların ailələrinin yaşadığı şəhərlərin həbsxanasına köçürülməsidir. Azərbaycanlı siyasi məhbusun səhhəti bu müddət ərzində kəskin şəkildə pisləşib. Əzəm Piri Vəlikəndi həyat yoldaşının ürək xəstəsi olduğundan, səhhətində yaranmış problemlərdən əziyyət çəkdiyini və xeyli çəki itirdiyini bildirib. A.Həsəni bu il iyunun 11-də qan təzyiqi və çəkisinin azalması səbəbindən zindanın klinikasına qaldırılıb. Bu il iyunun 26-da azərbaycanlı siyasi məhbusu aclığı dayandırması üçün ona təzyiq göstərmək məqsədilə Tehranın Evin həbsxanasına köçürüblər.
Qeyd edək ki, İran İnformasiya, Təhlükəsizlik və Kəşfiyyat Nazirliyinin (ETTELAAT) əməkdaşları A.Həsənini 2013-cü il fevralın 6-da Kərəc şəhərində həbs edib. Təbriz İnqilab Məhkəməsi azərbaycanlı fəalı hakimiyyət əleyhinə təbliğat aparmaq və qanunsuz təşkilat yaratmaqda günahlandıraraq 9 il müddətinə azadlıqdan məhrum edilməsi barədə qərar qəbul edib. Qərar Şərqi Azərbaycan vilayətinin Apelyasiya Məhkəməsi tərəfindən də təsdiqlənib. L.Həsəni hazırda Təbriz Mərkəzi Həbsxanasında saxlanılır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
