Sosial

Ana səhifə

Sosial

Əlilliyi olan gənclər üçün əmək yarmarkası keçirilib

05 may 2018 10:17 (UTC +04:00)

Gənclər və İdman Nazirliyi, Əmək və Əhalinin Sosial Müdafiəsi Nazirliyi, Əlil Təşkilatları İttifaqı və UNEC-in birgə təşkilatçılığı ilə əlilliyi olan gənclər üçün əmək yarmarkası keçirilib.

APA-nın xəbərinə görə, yarmarkada "Bank of Baku", " ATA Holding", "Coca-Cola", "Nobel Oil", "Azercell", "Nar", KPMG" beynəlxalq şirkəti, "Asan Kadr", Dövlət İmtahan Mərkəzi, Vergilər Nazirliyi, Mərkəzi Bank, Kapital Bank, Turan Bank, Express Bank, YapıKredi Bank, Veysəloğlu Şirkətlər Qrupu, Gilan Holding də daxil olmaqla 60-a yaxın şirkət iştirak edir. Vakansiya üçün müraciət edəcək vətəndaşdan ali təhsilli, ən azından peşə təhsilli olması və xüsusi bacarıqlar tələb olunur.

Ümumilikdə 2006-cı ildən gənclər üçün məzun yarmarkarlarının təşkil edildiyini xatırladan gənclər və idman nazirinin müavini İntiqam Babayev bu tədbirlərin gənclərin məşğulluq məsələsinə kifayət qədər müsbət təsir etdiyini deyib.

İ.Babayev əlilliyi olan şəxslər üçün ilk dəfə olaraq belə bir əmək yarmarkası təşkil edildiyini qeyd edib: "Belə qərara gəldik ki, bu dəfə sırf əlilliyi olan insanlar üçün əmək yarmarkası təşkil olunsun. Bu gün burda 47 özəl şirkət tərəfindən 160-dan artıq real vakansiya təqdim olunub. Eyni zamanda gələcəkdə yaranacaq vakansiyalar üçün məlumat bazası toplanılıb.

Aidiyyatı üzrə dövlət məşğulluq idarələri də müvafiq sayda vakansiyaları təklif ediblər. Düşünürəm ki, ilk dəfə keçirilən bu yarmarka uğurlu nəticə verəcək".

Nazir müavini gələcəkdə bu cür tədbirlərin daha geniş formatda həyata keçiriləcəyini vurğulayıb.

UNEC-in rektoru Ədalət Muradov isə çıxışında bu tədbirə dəstək göstərən Nazirliklərə təşəkkür edib və əlilliyi olan bütün gəncləri UNEC-də təhsil almağa dəvət edib.

Yarmarkanın keçirilməsində əsas məqsəd sosial müdafiəyə ehtiyacı olan gənclərin məşğulluğunun təmin edilməsi, sosial sahənin inkişafı ilə bağlı siyasətin əsas istiqamətlərindən biri olan əlil gənclərin bütün sahələrdə xidmətlərə əlçatanlığınl təmin etmək və inklüziv mühitin yaradılmasıdır.

Qeyd edək ki, dövlət başçısının imzaladığı "Azərbaycan gəncliyi 2017-2021-ci illərdə" və "2018-2014-cü illərdə Azərbaycan Respublikasında sağlamlıq imkanları məhdud şəxslər üçün inklüziv təhsilin inkişafı üzrə" Dövlət Proqramları sağlamlıq imkanları məhdud şəxslərin təhsil üçün maneəsiz mühit yaratmağa və onların məşğulluq imkanlarının genişləndirilməsinə xidmət edir.