Bakı. Fuad Cəfərov - APA. Qaçqın və məcburi köçkünlərin işləri üzrə Dövlət Komitəsi bir qrup məcburi köçkünün bu gün səhər saatlarında qurumun binası qarşısında aksiya keçirmək cəhdlərinə münasibət bildirib.
Qaçqın və Məcburi Köçkünlərin Problemləri üzrə Dövlət Komitəsinin Məskunlaşma miqrasiya məşğulluq və status şöbəsinin müdiri Sənan Hüseynov APA-ya açıqlamasında bildirib ki, komitənin binası qarşısına toplaşan şəxslər respublika, habelə paytaxt ərazində məskunlaşan məcburi köçkünlərdir: “Hər ayın 1-i və 15-i komitədə qəbul keçirilir. Bu gün həmin qəbula gələn şəxslərin sayı həddən artıq çoxdur. Lakin bütün şikayətçilər komitə sədrinin müavini, aparat rəhbəri və işğal altında olan rayonların icra hakimlərinin müavinləri tərəfindən qəbul olunur. Şikayətə gələn məcburi köçkünlər əsasən mənzil problemindən əziyyət çəkir. Qanunvericiliyə əsasən məcburi köçkünlərin ev problemi tədricən həll ediləcək və onlar hazırda tikilən mənzillərlə təmin ediləcək”
***
11.47
Bakı. Fuad Cəfərov - APA. Bir qrup məcburi köçkün bu gün səhər saatlarından Qaçqın və məcburi köçkünlərin işləri üzrə Dövlət Komitəsinin binası qarşısında aksiya keçirir.
APA-nın hadisə yerində olan müxbirinin verdiyi məlumata görə, məcburi köçkünlər öncə binanın qarşısından keçən Tbilisi prospektini bağlayıblar. Polisin müdaxiləsindən sonra yol açılıb, avtomobillərin hərəkəti bərpa olunub.
Hazırda aksiyaçılar Dövlət Komitəsinin binası qarşısında toplaşıblar. Onlara komitə rəsmiləri tərəfindən qəbul olunacaqları bildirilib.
Aksiya keçirən şəxslər vaxtilə Binəqədi rayonunun 9-cu mikrorayonu ərazisində yanğın baş vermiş çoxmərtəbəli binada məskunlaşan Ağdam, Xocalı, Kəlbəcər, Xocavənd rayonundan olan məcburi köçkünlərdir. Onlar sonradan Mehdiabad qəsəbəsindəki məcburi köçkün şəhərciyində yerləşdirilsələr də, yaşayış yerlərində sıxlıqla bağlı narazılıqlarını bildiriblər.
Aksiyaçıların bir qismi isə hələ də onlara yer ayrılmadığını deyiblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
