Bakı - APA-Economics. Qara Dəniz Universitetləri şəbəkəsinin baş katibi professor Eden Mamut Bakı Ali Neft Məktəbində (BANM) olub.
Məktəbin mətbuat xidmətindən “APA-Economics”ə verilən məlumata görə, BANM-nin professor-müəllim heyəti ilə görüşdə rektor Elmar Qasımov qonağa təhsil müəssisəsinin yaranma tarixi, 2 illik fəaliyyəti ərzində əldə etdiyi uğurları, tədris prosesinin Böyük Britaniyanın Heriot-Vatt Universitetinin proqramları və müasir texnologiyalar əsasında həyata keçirildiyi haqqında məlumat verib, məzunlara hər iki ali təhsil müəssisəsinin diplomlarının veriləcəyini qeyd edib.
O, təhsil müəssisəsinin fəaliyyətində beynəlxalq əlaqələrin genişləndirilməsinin prioritet istiqamət olduğunu bildirib, bu istiqamətdə görülmüş işlər, Avropa ölkələrinin bir sıra aparıcı təhsil müəssisələri ilə əməkdaşlıq əlaqələri haqqında qonağı məlumatlandırıb, Qara Dəniz Universitetləri şəbəkəsi ilə əməkdaşlıq əlaqələrinin qurulmasının BANM-nin Qara Dəniz hövzəsi ölkələrinin aparıcı universitetləri ilə əməkdaşlığının genişləndirilməsində önəmli rol oynayacağını qeyd edib, əməkdaşlıq əlaqələrinin möhkəmləndirilməsi üçün təkliflər irəli sürüb və şəbəkənin rəhbərliyinə kollektivin minnətdarlıq hisslərini çatdırıb.
Qara Dəniz Universitetləri şəbəkəsinin baş katibi professor Eden Mamut Azərbaycanın gənc və müasir tipli texniki ali təhsil müəssisəsində olmağından məmnunluq hissləri keçirdiyini bildirib, rəhbərlik etdiyi təşkilatın Qara Dəniz hövzəsi ölkələrinin ali təhsil müəssisələri arasında mütəxəssis hazırlığı, elmi-tədqiqat işləri, informasiya, təcrübə mübadiləsi kimi istiqamətlər üzrə əməkdaşlıq əlaqələrinin qurulmasına xidmət etdiyini vurğulamış, bu işlərin həyata keçirilməsi üçün təşkil edilən konsorsiumlar və mərkəzlərin yaradılması, biliklərin yayılmasının proseslərinə universal yanaşmalar haqqında məlumat verib, BANM-nin bu təşkilata üzv qəbul edildiyini bildirib.
Görüş zamanı BANM ilə Qara Dəniz Universitetləri Assosiasiyasına üzv olan universitetlər arasında əməkdaşlıq əlaqələrinin perspektivləri müzakirə edilib.
Daha sonra professor Eden Mamut BANM-nin Qara Dəniz Universitetləri şəbəkəsinə üzv qəbul edildiyini təsdiqləyən sertifikatı təhsil ocağının rektoru Elmar Qasımova təqdim edib.
Görüşün sonunda BANM ilə Qara Dəniz Universitetləri şəbəkəsi arasında əməkdaşlığın genişləndirilməsinə verdiyi töhfələrə görə professor Eden Mamuta “Fəxri qonaq” diplomu təqdim edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
