Bakı. Yeganə Laçınzadə - APA-Economics. "Azərbaycan İnvestisiya Şirkəti" ASC 2014-2015-ci illər üzrə maliyyə nəticələrinə görə müvafiq olaraq 1 mln. 69,3 min manat və 17 mln. 385,5 min manat mənfəəti olmasına baxmayaraq, dövlət büdcəsinə müvafiq vergilərin ödənilməsi istisna olmaqla, aidiyyati üzrə heç bir dividend ödəməyib.
"APA-Economics" xəbər verir ki, bu barədə məlumat Hesablama Palatasının “Azərbaycan Respublikasının 2015-ci il dövlət büdcəsinin icrası haqqında” qanun layihəsinə və dövlət büdcəsinin icrasına dair illik hesabata rəyində əksini tapıb.
2016-cı ilin 1 yanvar tarixinə “Azərbaycan İnvestisiya Şirkəti” ASC-nin 5 səhmdar cəmiyyətində 58 mln. 883,3 min manat məbləğində səhmlər və paylar üzrə vəsait qoyuluşu mövcud olub ki, bunlardan isə yalnız şirkətin 25% iştirak payı olan 1 ASC tərəfindən dividendlər ödənilib. Cari ilin əvvəlinə həmin məbləğ 4 mln. 927,8 min manat təşkil edib.
Qeyd edək ki, prezident İlham Əliyevin müvafiq sərəncamına əsasən "Azərbaycan İnvestisiya Şirkəti" ASC-nin dövlətə məxsus (100%) səhmlərinin saxlanılması və idarə olunması İqtisadi İnkişaf Nazirliyi (hazırda İqtisadiyyat Nazirliyi - red.) tərəfindən, səhmlər üzrə dividendlərin isə Azərbaycan Respublikası Dövlət Neft Fonduna köçürülməsi müəyyən edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
