Hadisə

Ana səhifə

Hadisə

Azərbaycan DİN-i və Baş Prokurorluğu Nardaranda baş verən hadisə ilə bağlı birgə məlumat yayıb

13 avqust 2008 16:17 (UTC +04:00)

DİN mətbuat xidmətindən APA-ya verilən məlumata görə, avqustun 12-də saat 17.30 radələrində, dəfələrlə ağır və xüsusilə ağır cinayətlər törətdiyinə görə axtarışda olan Sabunçu rayonunun Nardaran qəsəbəsinin sakini, 1986-cı il təvəllüdlü Zülfüqar Cabbarovun tutularaq istintaqa təqdim olunması məqsədi ilə DİN-in Baş Mütəşəkkil Cinayətkarlıqla Mübarizə, Bakı Şəhər Baş Polis və Sabunçu Rayon Polis idarələrinin əməkdaşları tərəfindən xüsusi əməliyyat keçirilib. Tədbir zamanı könüllü sürətdə hakimiyyət orqanlarına təslim olması təklif edilmiş Z. Cabbarov və cinayətkar dəstənin üzvü, əvvəllər məhkum olunmuş Aqil Muxtarov polisin qanuni tələblərinə tabe olmadan əməliyyat qrupunun üzvlərinə odlu silahlardan atəş açıblar. Daxili işlər orqanlarının əməkdaşlarına yönəlmiş odlu silahla müşayiət olunan zorakılığın qarşısı alınarkən Z. Cabbarov və A. Muxtarov zərərsizləşdirilərək məhv edilib, onların istifadəsindəki “Hyundai” markalı avtomaşında olan Səbinə Əliyeva isə həyatı üçün təhlükəli olmayan xəsarət alaraq xəstəxanaya yerləşdirilib.

Z. Cabbarovun atası, xüsusilə ağır cinayət törətdiyinə görə barəsində həbs-qətimkan tədbiri seçilməklə axtarışda olan Əmirxan Cabbarov hadisədən xəbər tutan kimi bir neçə nəfərlə birlikdə “Jiquli” markalı maşınla hadisə yerinə gələrək xidməti vəzifələrini yerinə yetirən polislərə avtomat silahdan atəş açıb, onları öldürmək məqsədilə 2 ədəd qumbara atıb. Atışma nəticəsində Ə. Cabbarov öldürülüb, cinayətin digər iştirakçıları isə hadisə yerində qaça biliblər. hadisə yerindən 3 ədəd avtomat, 1 ədəd “Makarov” tipli tapança, içində 30 ədəd patron olan avtomat sandıqçası, 1 ədəd “F - 1” tipli qumbara, xeyli 5,45 və 7,68 kalibrli avtomat patronu və partlamamış qumbara qalığı aşkarlanıb.
Qeyd edək ki, 22 yaşlı Z. Cabbarov 2006-cı ildə qanunsuz silah əldə etmə, saxlama və gəzdirmə cinayətində təqsirili bilinərək məhkəmənin hökmü ilə 2 il müddətinə azadlıqdan məhrum edilib. 2007-ci ilin sentyabrında azadlığa buraxılan Z. Cabbarov həmin il oktyabrın 5-də Nardaranda qanunsuz gəzdirdiyi silahla qohumu Sahib Talıbovu yaralayaraq hadisə yerindən qaçıb. Onun tutulması üçün 2008-ci ilin fevralın 20-də Nardaranda keçirilən əməliyyat zamanı o, özündə saxladığı avtomat silahdan atəş açaraq Sabunçu rayon Polis İdarəsinin 14-cü polis bölməsi rəis müavini Zaur Bədəlovu yaralayıb. Z. Cabbarov avqustun 11-də Nardaran qəsəbəsində, münaqişə zəminində həmyerlisi Sahib Süleymanovu öldürmək məqsədilə avtomat silahdan atəş açaraq onun idarə etdiyi “Mercedes” markalı mikroavtobusu gülləbaran edib.

Uzun müddət cinayətkar əməlləri ilə ictimaiyyətə, qanunlara açıq hörmətsizlik və itaətsizlik nümayiş etdirən Z. Cabbarov, atası Əmirxanın və cinayətkar dəstənin üzvü A. Muxtarovun zərərsizləşdirilməsi Nardaranda ictimai asayişin mühafizəsinə, sakinlərin təhlükəsizliyinin təmin olunmasına real zəmin yaradıb.

Baş vermiş hadisə ilə əlaqədar Cinayət Məcəlləsinin ağır və xüsusilə ağır məsuliyyəti nəzərdə tutan maddələri ilə cinayət işi qaldırılaraq, Baş Prokurorluğun Ağır Cinayətlərə Dair İstintaq İdarəsinin icraatına götürülüb. Törədilmiş ağır cinayətin qaçıb gizlənən iştirakçılarının müəyyən edilərək məsuliyyətə cəlb edilməsi, habelə cinayətkar dəstənin üzvlərinin iştirakı ilə törədilmiş digər cinayətlərin açıqlaması istiqamətində kompleks əməliyyat-axtarış və istintaq tədbirləri davam etdirilir.

Zülfüqar_Cabbarov_axtarış