Hadisə

Ana səhifə

Hadisə

Əməliyyat zamanı dünyasını dəyişmiş xəstənin yaxınları baş verən faciəyə görə həkimdən prokurorluğa şikayət ediblər - FOTO

Əməliyyat zamanı dünyasını dəyişmiş xəstənin yaxınları baş verən faciəyə görə həkimdən prokurorluğa şikayət ediblər - <font color=red>FOTO</font>

10 noyabr 2008 14:26 (UTC +04:00)

Bakı. Kəmalə Quliyeva - APA. Xətai rayonunda, “Bakı” kinoteatrının yaxınlığında yerləşən “Diaqnoz” Tibb Mərkəzində faciə baş verib. APA-nın məlumatına görə, noyabrın 8-də burun çəpərinin əyriliyi üzündən əməliyyata gətirilən 31 yaşlı Ruslan Həmidov adlı xəstə əməliyyat zamanı dünyasını dəyişib. Məlumatda bildirilir ki, həkim İlqar Əzimov mili nəfər borusundan xəstənin burnuna daxil etmək istəyərkən aorta damarına toxunub. Aorta damarında başlayan qanaxma nəticəsində R. Həmidov cərrahiyyə stolunda dünyasını dəyişib. R. Həmidovun yaxınları bunun sadə əməliyyat olduğunu bildirir, faciənin həkimin səriştəsizliyi və səhlənkarlığı ucbatından baş verdiyini iddia edirlər. Onların sözlərinə görə, Məhkəmə Tibb Ekspertizası da hadisənin həkimin səhlənkarlığı üzündən baş verdiyini təsdiqləyib.

“Diaqnoz” Tibb Mərkəzinin direktor müavini Qocəli Nağıyev APA-ya bildirib ki, hadisə ilə bağlı hələlik açıqlama vermək istəmirlər: “Məhkəmə Tibb Ekspertizasının rəsmi rəyinin daxil olmasını gözləyir. Yalnız onu deyə bilərəm ki, biz bu hadisəni Tibbi Mərkəzinin baş həkiminin yanında müzakirə eləmişik. Hələlik başqa açıqlama verə bilmərəm”. Baş verən olayla əlaqədar həkim İlqar Əzimovun cəzalandırılmadığını bildirən Q. Nağıyevin sözlərinə görə, həkimin əlindən xata çıxa bilər: “Amma bu sübuta yetməyincə, heç nə deyə bilmərik. Hələ bilmirik ki, bu hadisədə həkim səhlənkarlığı var, ya yox. Aydın məsələdir ki, hadisə olubsa, günahkarlar cəzalandırılmalıdır”.

Səhiyyə Nazirliyinin (SN) mətbuat xidmətindən isə APA-ya bildirilib ki, xəstə “Diaqnoz” Tibb Mərkəzinə 08.11.2008-ci ildə günorta saatlarında gətirilib. Xəstədə septoplastik- burun ara kəsiyinin plastik əməliyyatı aparılıb. Əməliyyatdan əvvəl R. Həmidov bütün zəruri analizlərdən keçirilib. Saat 13.00-da əməliyyat olunan R. Həmidov narkozdan normal vəziyyətdə ayılıb və qohumları ilə söhbət edib. Əməliyyatdan 7 saat sonra isə xəstə qəfildən qan qusmağa başlayıb. Ona tibbi yardım edilsə də, qanaxmanı dayandırmaq mümkün olmayıb və xəstə bu səbəbdən keçinib. SN-dən o da deyilib ki, tibbi ekspert xəstənin qan itirmədən dünyasını dəyişdiyini bildirsə də, bu qanaxmanın burundan, yaxud mədədən baş verdiyini göstərməyib. Hələlik bununla əlaqədar kistoloji müayinələr aparılır. Nəticəyə uyğun olaraq həkimlə bağlı qərar çıxarılacaq.

Xətai rayon Prokurorluğundan da APA-ya bildirilib ki, faktla əlaqədar R. Həmidovun ailəsi tərəfindən onlara artıq şikayət daxil olub. Prokurorluğa daxil olan şikayət əsasında hazırda araşdırma aparılır.

Ruslan_Həmidov