Hadisə

Ana səhifə

Hadisə

Bakı Metropoliteninin stansiyalarına bomba qoyulması barədə polisə anonim zəngin haradan edildiyi müəyyənləşib

22 dekabr 2008 14:05 (UTC +04:00)

Bakı. Hafiz Heydərov - APA. Bakı Metropoliteninin “Qara Qarayev” və “Nəriman Nərimanov” stansiyalarına bomba qoyulması barədə polisə daxil olan anonim zənglərlə bağlı cinayət işi başlanılıb. Hər iki fakt üzrə Nizami və Nərimanov Rayon Polis idarələri tərəfindən Cinayət Məcəlləsinin 216-cı (terror aktı barədə bilə-bilə yalan məlumat vermə) maddəsi ilə istintaq aparılır. Bakı şəhər Baş Polis İdarəsindən APA-ya verilən məlumata görə, hər iki hadisə ilə bağlı aparılan əməliyyat tədbirləri nəticəsində məlumatın yalan olduğu təsdiqlənib. Araşdırmalar nəticəsində, həmçinin, məlum olub ki, anonim zəng avtomat telefondan edilib. Məhz bu fakt zənglərin kim tərəfindən edildiyini müəyyənləşdirməkdə çətinlik yaradır. Buna baxmayaraq, polisə yalan informasiya verən şəxsin tapılması istiqamətində əməliyyat-axtarış tədbirləri davam etdirilir.

Qeyd edək ki, dekabrın 18-də Daxili İşlər Nazirliyinin “102” xidmətinə anonim zəng edilərək, Bakı Metropoliteninin “Nəriman Nərimanov”, dekabrın 21-də isə “Qara Qarayev” stansiyalarına bomba qoyulması barədə məlumat verilib. Məlumat əsasında hüquq-mühafizə orqanlarının xüsusi əməliyyat qrupu və Fövqəladə Hallar Nazirliyinin ekspertləri hadisə yerində əməliyyat-axtarış tədbirləri həyata keçirilib. Araşdırmalar nəticəsində məlumatın yalan olduğu üzə çıxıb.