Hadisə

Ana səhifə

Hadisə

19 il öncə həyat yoldaşını qətlə yetirən Ağcabədi sakini 12 il müddətinə azadlıqdan məhrum edilib

29 dekabr 2008 15:07 (UTC +04:00)

Bakı. Ramil Məmmədli – APA. Bu gün Ağır Cinayətlərə Dair İşlər üzrə Məhkəmədə 19 il öncə həyat yoldaşını qətlə yetirərək, qaçan Ağcabədi rayon sakini Tofiq Rüstəmova hökm oxunub. APA-nın məlumatına görə, hakim Eynulla Vəliyevin sədrliyi ilə keçirilən prosesdə T. Rüstəmov 12 il azadlıqdan məhrum edilib.
İttiham aktına görə, Tofiq Rüstəmov 1981-ci ildə həmyerlisi Əhməd Hüseynovu öldürməyə cəhd etdiyinə görə həbs olunub və 1988-ci ildə azadlığa çıxıb. Elə həmin il ailə həyatı quran Tofiq Rüstəmov bir il sonra, yəni, 1989-cu il mayın 25-də həyat yoldaşı Alagöz Rüstəmovanı qısqanclıq zəminində azyaşlı qızları Ceyran və Tərlanın gözləri qarşısında balta ilə qətlə yetirib. Bundan sonra o, həyat yoladzaşını qətlə yetirərkən azyaşlı qızı Tərlanın ona mane olmasına əsəbiləşib və qızını da öldürmək qərarına gəlib. Bu məqsədlə o, azyaşlı qızının baş nahiyyəsindən zərbə vurub. Amma azyaşlı qız xəstəxanaya vaxtında çatdırıldığından həyatını xilas etmək mümkün olub. Tofiq Rüstəmovun özü isə qaçıb.
1992-ci ildə mal-qara oğurluq üstündə həbs olunub və Bərdə şəhər Məhkəməsinin hökmü ilə 6 il müddətinə cəza alıb. Tofiq Rüstəmov heç bir sənədinin olmadığını səbəb gətirərək özünü Ermənistanın Spitak şəhərinin sakini Vaqif Kazımov kimi təqdim edib. Həbsindən 3 il sonra əfv fərmanı ilə azadlığa çıxandan sonra Qaradağ rayonunu Qızıldaş qəsəbəsində elə Vaqif Kazımov adı ilə qeydiyyata düşüb və orada yaşamağa başlayıb. Yenidən ailə quran Vaqif Kazımov (Tofiq Rüstəmov) 3 uşaq atasıdır. O, Ağcəbədi rayon Polis Şöbəsinin əməkdaşları tərəfindən bu il fevralın 29-da həbs edilib. Onun həbs olunmasına səbəb isə birinci arvadından olan oğlu Ramil olub. Təsadüfən qarşılaşan oğlu Tofiq Rüstəmovu polisə təslim etmək əvəzinə şantaja əl atıb. “Binə” Ticarət Mərkəzində işləyən Tofiq Rüstəmov oğlunun şantajları qarşısında ona əvvəlcə avtomobil alıb və daha sonra ona xeyli pul verib. Lakin Ramil atasını şantaj edərək daha bahalı maşın almasını tələb edib. Tofiq Rüstəmov isə oğlunun bu istəyinindən imtina edib. Ramil atasının 19 il əvvəl törətdiyi cinayət barədə polisə məlumat verib və deyib ki, atası Vaqif Kazımov sənədi ilə Qaradağ rayonunda qeydiyyatdadır. Bu xəbərdən sonra Ağcabədi rayon Polis Şöbəsinin əməkdaşları araşdırmalara başlayıblar və onu bu il fevraılın 29-da həbs ediblər.
Qeyd edək ki, T. Rüstəmov Cinayət Məcəlləsinin 120.2.2 (xuliqanlıq niyyəti ilə adam öldürmə), 120.2.10-cu (təkrar adam öldürmə), 120.1-ci (qəsdən adam öldürmə), 320-ci (rəsmi sənədləri, möhürləri, ştampları saxtalaşdırma, hazırlama, satma və ya saxta sənədlərdən istifadə etmə) maddələri ilə ittiham olunub.